බූස්ස බන්ධනාගාරයේ විශ්‍රාමික අධිකාරිවරයා ඝාතනය කළ වෙඩික්කරු රටින් පනින්න හදද්දී අත්අඩංගුවට

බූස්ස බන්ධනාගාරයේ විශ්‍රාමික අධිකාරීවරයාට පසුගියදා සිය නිවස ඉදිරිපිට දී වෙඩි තබා ඝාතනය කළ වෙඩික්කරු ව්‍යාජ ගමන් බලපත්‍රයක් භාවිතා කරමින් තායිලන්තය වෙත පැන යාමට කටුනායක ගුවන් තොටුපොළ වෙත පැමිණ සිටියදී අද (15) දින උදෑසන අපරාධ පරීක්ෂණ දෙපාර්තමේන්තු නිලධාරීන් පිරිසක් විසින් අත්අඩංගුවට ගනු ලැබුවා.

දසත ගුවන්තොටුපොළ වාර්තාකරු පැවසුවේ සැකකරු ව අත්අඩංගුවට ගැනීමට කටුනායක ගුවන් තොටුපොළ පිටත්වීමේ පර්යන්තයේ ස්ථාපිත කර ඇති ” මුහුණු හඳුනා ගැනීමේ පද්ධතිය ” (Face Recognize System) අපරාධ පරීක්ෂණ දෙපාර්තමේන්තු නිලධාරීන් විසින් සහාය කර ගෙන තිබූ බවයි.

31 හැවිරිදි අම්බලන්ගොඩ – කුලීගොඩ ප්‍රදේශයේ පදිංචි විජේමුනි ලලන්ත ප්‍රීතිරාජ් කුමාර නමැති මොහු දකුණේ සංවිධානාත්මක අපරාධ කල්ලි නායක ” කරන්දෙණිය සුද්දා ” නමැති අයගේ ප්‍රධාන වෙඩික්කරු ලෙස කටයුතු කරමින් සිටි පුද්ගලයා බව පොලීසිය විසින් අනාවරණය කරගෙන තිබෙනවා.

ඒකනායක මුදියන්සේලාගේ ලකිඳු සංදීප් බණ්ඩාර නමැති ව්‍යාජ නමකින් සකස් කළ ගමන් බලපත්‍රයක් යොදා මොහු රටින් පැන යාම සඳහා භාවිතා කර තිබූ අතර මොහු ගාල්ල සහ අම්බලන්ගොඩ පොලිස් බල ප්‍රදේශවල මිනීමැරුම් සහ මූල්‍ය වංචා රාශියක් සඳහා ද පොලිසියට අවශ්‍ය කර සිටි අයෙක්.

අද උදෑසන 07.50ට තායිලන්තයේ – බැංකොක් නුවර බලා පිටත්ව යන ශ්‍රී ලන්කන් ගුවන් සේවයේ යූ.එල්.- 404 දරන ගුවන් යානයට කටුනායක ගුවන් තොටුපොළ වෙත සැකකරු පැමිණ සිටි බවයි වාර්තාවන්නේ.

අත්අඩංගුවට ගත් මෙම වෙඩික්කරුවා ව අද පෙරවරු10.00ට පමණ අම්බලන්ගොඩ මූලස්ථාන පොලිසියේ ස්ථානාධිපතිවරයා ඇතුළු නිලධාරීන් පිරිසක කටුනායක ගුවන් තොටුපොළ වෙත පැමිණ රැගෙන ගොස් තිබෙනවා.