ගෙවුණු පැය 24ක කාලය තුළ සිදුවෙන්නට ගිය ජීවිත හානි හතරක් ඉන් මුදා ගැනීමට පොලිස් ජීවිතාරක්ෂක ඒකකයේ නිලධාරීන්ට හැකි වුණා.
පොලිස් මාධ්‍ය ප්‍රකාශක කාර්‍යාලය නිවේදනය කළේ ඊයේ (06) පස්වරුවේ අහුන්ගල්ල වෙරළ තීරයේ දිය නෑමට ගිය විදෙස් ජාතිකයෙකු දිය රළට හසු වී ගසාගෙන යමින් සිටියදී එම එම ස්ථානයේ රාජකාරීයේ යෙදී සිටි පොලිස් ජීවිතාරක්ෂක ඒකකයට අනුයුක්ත පොලිස් පරික්‍ෂක මනෝජ් ආරියරත්න ඇතුළු නිලධාරීන් විසින් අදාළ පුද්ගලයා ව නිරුපද්‍රිතව බේරාගෙන ඇති බවයි.
මෙලෙස ජීවිතය බේරාගත් තැනැත්තා 38 හැවිරිදි රුසියානු ජාතිකයෙක්.
මේ අතර හික්කඩුව පොලිස් ජීවිතාරක්ෂක ඒකකයේ නිලධාරීන් ද දිය රළකට ගසාගෙන යමින් සිටි විදේශිකයින් තිදෙනෙකු ඊයේ බේරාගැනුණා.
ඊයේ උදෑසන කාලයේ දී හික්කඩුව වෙරළ තීරයේ දිය නාමින් සිටියදී විදෙස් ජාතික කාන්තාවක් හා පිරිමි පුද්ගලයින් දෙදෙනෙකු දිය වැළකට හසුව ගසාගෙන යමින් සිටියදී එම ස්ථානයේ රාජකාරී යෙදී සිටි පොලිස් ජීවිතාරක්ෂක ඒකකයට අනුයුක්ත උප පොලිස් පරික්‍ෂක සිරිමල්, පොලිස් කොස්තාපල් දුමින්ද, පොලිස් කොස්තාපල් කුමාර හා පොලිස් කොස්තාපල් ජයසිංහ යන නිලධාරීන් විසින් ඔවුන් නිරුපද්‍රිතව බේරාගන්නා ලද බවත් වාර්තා වනවා.
අනතුරට පත් කාන්තාව වයස අවුරුදු 27ක් හා පිරිමි පුද්ගලයින් අවුරුදු 42 හා 71 යන වයස්වල පසුවන රුසියානු ජාතිකයින්.
