අදානි සමාගම විසින් මන්නාරමේ සහ පුනරීන් හි ක්‍රියාත්මක කිරීමට යෝජිත සුළං විදුලි බලාගාර ව්‍යාපෘති ගිවිසුම වත්මන් රජය විසින් නවතා දැමීමක් සිදුකර නොමැති බව රජය පවසනවා.
අද (25) පස්වරුවේ රජයේ ප්‍රවෘත්ති දෙපාර්තමේන්තුවේ පැවති විශේෂ ප්‍රවෘත්ති සාකච්ඡාවක දී කැබිනට් මාධ්‍ය ප්‍රකාශක අමාත්‍ය නලින්ද ජයතිස්ස මේ බව අවධාරණය කර සිටියා.
කෙසේ වෙතත් අදාළ ව්‍යාපෘතිය මඟින් ඉදිරිපත් කර ඇති විදුලි ගාස්තු සම්බන්ධයෙන් පමණක් නැවත සමාලෝචනය කිරීමට කැබිනට් මණ්ඩලය තීරණය කර ඇති බවයි අමාත්‍යවරයා වැඩිදුරටත් පැවසුවේ.
මේ හේතුවෙන් ව්‍යාපෘති අවලංගුවීමක් සිදු නොවන බවයි ඔහු මෙහිදී සඳහන් කර සිටියේ.
“රටේ ජනතාවට අපි පවසන්න ඕනේ ගිවිසුම් අහෝසි කරන්න තීරණයක් නැහැ. සමාලෝචනය කරන්න විතරයි ආණ්ඩුවක් හැටියට අපි තීරණය කරලා තියෙන්නේ. කොහෙම වුණත් නඩු කටයුතු කිහිපයක් තියෙන නිසා ඒ නඩු අවසානයේ දී තමයි රජයට තීරණයක් ගන්න වෙන්නේ.”
