2015 වර්ෂයේ ජනාධිපතිවරණ සමයේ දී පාසල් අතර බෙදාහැරීම සඳහා යැයි පවසමින් ලංකා සතොස හරහා ආනයනය කරන ලද රුපියල් කෝටි පහමාරකට අධික වටිනාකමකින් යුත් දාම් හා කැරම් බෝඩ් උපකරණ තොගයක් වෙනත් කටයුතු සඳහා යෙදවීමේ චෝදනාවලට වැරදිකරුවන් කරමින් නඩු පවරා ඇති එවක හිටපු වෙළෙඳ අමාත්‍ය නලීන් රුවන්ජිත් ප්‍රනාන්දු හා ක්‍රීඩා අමාත්‍ය මහින්දානන්ද අලුත්ගමගේ යන අයට එරෙහිව ඇති චෝදනාවල සාක්ෂි විමසීම අද (19) අවසන් කෙරුණා.
අද පෙරවරුවේ විත්තිකාරයින් දෙපළ ම පෞද්ගලිකව ම අධිකරණය හමුවේ පෙනී සිටි අතර එහිදී බස්නාහිර පළාත් බද දෙවැනි මහාධිකරණ ත්‍රිපුද්ගල විනිසුරු මඬුල්ල තීරණය කළේ එම නඩුවේ ලිඛිත හා වාචික දේශන ලබන ජනවාරි මස 22 වැනි දින කැඳවීමටයි.
එහි පළමු විත්තිකාර නලීන් ප්‍රනාන්දු හට ජනවාරි මස 10 සිට 16 දක්වා කාලය තුළ විදෙස්ගත වීමට ද අවසර හිමිවුණා.
මෙම අවසරය සම්බන්ධයෙන් ආගමන හා විගමන පාලකවරයා ඇතුළු බලධාරීන්ව දැනුම්වත් කරන ලෙසයි ත්‍රිපුද්ගල විනිසුරුවරුන් වූ ප්‍රදීප් හෙට්ටිආරච්චි, මහේන් වීරමන් සහ ප්‍රදීප් අබේරත්න යන විනිසුරුවරුන් විසින් නියෝග කරනු ලැබුවේ.
