යාපනයේ පැතිර යන හඳුනා නොගත් වෛරස තත්ත්වය හේතුවෙන් මියගිය ගණන මේ වනවිට (11) පුද්ගලයින් සයදෙනෙකු මරණයට පත් ව ඇති බව රෝහල් ආරංචි මාර්ග තහවුරු කරනවා.
යාපනයේ රෝහලේ අධ්‍යක්ෂ වෛද්‍ය ටී. සත්‍යමූර්ති මහතා පැවසුවේ මෙලෙස මියගොස් ඇති සියලුදෙනා ශ්වසන අපහසුතා හේතුවෙන් ජීවිතක්ෂයට පත් ව ඇති බවයි.
මෙම වෛරසය පළමු ව උණ රෝගයක් ලෙස වැළඳී ඇති බවත්; මියගිය පිරිසට තිබී ඇත්තේ උණ සහ කැස්ස බව ද රෝහල් ආරංචි මාර්ග පවසනවා.
මියගිය පුද්ගලයින්ගේ දේහ කොටස් වැඩිදුර විමර්ශන කටයුතු සඳහා කොළඹ ජාතික රෝහල වෙත එවා ඇති බවත් මී උණ හෙවත් ලෙප්ටොස්පයිරා නමැති මීයන්ගෙන් සහ මීගවයින්ගෙන් මළමුත්‍රා ආශ්‍රයෙන් වැළඳෙන රෝගය විය හැකි බවට සැක පළ කරන බවත් යාපනය රෝහලේ අධ්‍යක්ෂවරයා පැවසුවා.
කෙසේවෙතත් එම හඳුනා නොගත් වෛරසය මී උණ දැයි නිශ්චිත ව හෙළි වී නැති බවයි හෙතෙම වැඩිදුරටත් සඳහන් කළේ.
මියගිය පිරිස අතර එක් කාන්තාවක් මෙන් ම තරුණයින් ද වැඩි වශයෙන් සිටින බවයි වාර්තා වන්නේ.
අවුරුදු 20-28, අවුරුදු 30 -45 සහ අවුරුදු 50 -65 අතර වයස් සීමාවල පසුවන්නන් සයදෙනෙකු මෙලෙස මරණයට පත් ව තිබෙනවා.
කෙසේවෙතත් අද දහවල් සෞඛ්‍ය ප්‍රවර්ධන කාර්යාංශයේ පැවති මාධ්‍ය හමුවකදී වසංගත රෝග විද්‍යා අංශය පැවසුවේ මී උණ රෝගය වැළඳුණු අයෙකුගේ සාමාන්‍යයෙන් රෝග ලක්ෂණ වන්නේ ඇඟපත අමාරුව, හිසේ කැක්කුම, වමනය, ඇස් රතුවීම ආදිය බවත් එවැනි රෝග ලක්ෂණ හෝ උණ හා කැස්ස පමණක් හෝ ඇත්නම් වහාම වෛද්‍ය උපදෙස් සඳහා යොමු වන ලෙසට ද වෛද්‍යවරු මහජනතාවගෙන් ඉල්ලා සිටිනවා.
