ඉදිරි මහ මැතිවරණයේ දී වන්නි දිස්ත්‍රික්කය සඳහා ඡන්ද විමසීම අත්හිටුවමින් අතුරු තහනම් නියෝගයක් නිකුත් කරන්නැයි ඉල්ලා ප්‍රජාතන්ත්‍රවාදී ජාතික සන්ධානය ඉදිරිපත් කළ පෙත්සම සම්බන්ධ නියෝගය හේතු සහිතව හෙට (23) ප්‍රකාශයට පත්කරන බව ශ්‍රේෂ්ඨාධිකරණය අද (22) දැනුම්දුන්නා.
නීතියට අනුව ප්‍රතික්ෂේප කරන ලද නාම යෝජනා තේරීම් බාර නිලධාරීයා භාර ගැනීම කළ යුතු බව ද පෙත්සමේ නියෝගය අද ප්‍රකාශයට පත්කරන බව දැනුම්දෙමින් ශ්‍රේෂ්ඨාධිකරණය සඳහන් කළා.
ශ්‍රේෂ්ඨාධිකරණ විනිසුරුවරුන් වන ප්‍රීතී පද්මන් සූරසේන, ශිරාන් ගුණරත්න සහ ජනක් ද සිල්වා යන මහත්වරුන්ගෙන් සැදුම්ලත් විනිසුරු මඩුල්ලක් හමුවේ පෙත්සම සලකා බැලුණා.
ප්‍රජාතන්ත්‍රවාදී ජාතික සන්ධානය පක්ෂයේ බලය ලත් නිලධාරී පරරාජසිංගම් උදයරාසා සහ තවත් අපේක්ෂකයින් දෙදෙනෙකු වන ජී. විජේන්ද්‍රන්රත්නම්, ඒ.කේ.ජී.සුබීහන් යන මහත්තුරු ගොනු කළ මෙම පෙත්සමේ වගඋත්තරකරුවන් වශයෙන් මැතිවරණ කොමිසමේ සභාපතිවරයා ඇතුළු එහි සාමාජිකයින්, වන්නි දිස්ත්‍රික් තේරීම් භාර නිලධාරියා ඇතුළු පිරිසක් නම් කර තිබෙනවා.
ඉදිරි මහ මැතිවරණයේ දී වන්නි දිස්ත්‍රික්කයෙන් තරඟ කිරීම සඳහා තමන් වන්නි දිස්ත්‍රික්කයේ තේරීම් භාර නිලධාරියාට සිය නාමයෝජනා පත්‍රය ඉදිරිපත් කළ බව පවසන පෙත්සම්කරුවෝ අදාළ නාමයෝජනා පත්‍රය විධිමත් ලෙස ඉදිරිපත් කර නොමැති බව සඳහන් කරමින් ඒ අවස්ථාවේදී අදාළ නාමයෝජනා පත්‍රය භාර ගැනීම තේරීම් භාර නිලධාරියා ප්‍රතික්ෂේප කළ බවත් සඳහන් කර ඇති බවයි වාර්තා වන්නේ.
විධිමත් ආකාරයෙන් සියලු ලේඛන ඉදිරිපත් කර තිබිය දී තම නාමයෝජනා පත්‍රය ප්‍රතික්ෂේප කිරීමට දිස්ත්‍රික් තේරීම් භාර නිලධාරියා ගනු ලැබූ තීරණය නීතියට පටහැනි බව පෙන්වා දෙන පෙත්සම්කරුවෝ මේ තත්ත්වය යටතේ තේරීම් භාර නිලධාරියාගේ තීරණය බල රහිත කරන රිට් ආඥාවක් නිකුත් කරන්නැයි ඉල්ලා සිටිනවා.
