ශ්‍රී ලංකා මැද පෙළ පිතිකරණයේ පෙර පැවති පුරප්පාඩුව මේ වනවිට යම්තාක් දුරකට හෝ භානුක රාජපක්ෂගේ පැමිණීමෙන් පිරවී ඇති බව ශ්‍රී ලංකා පන්දුවාර 20 නායක චරිත් අසලංක පවසනවා.
ඊයේ (17) පැවති අවසන් පන්දුවාර 20 ක්‍රිකට් තරගය ද කඩුලු 09කින් ජය ගැනීමෙන් පසුව පැවති මාධ්‍ය හමුවට එක්වෙමින් අසලංක මේ බව සඳහන් කළා.
තමන් සිය මව්බිමේ දී කොදෙව්වන්ට එරෙහිව ටී20 තරගාවලි ජයක් ලැබූ පළමු අවස්ථාව මෙය බවත්; ඒ සඳහා තම කණ්ඩායමේ සියලු ම ක්‍රීඩකයින්ගේ උපරිම දක්ෂතාව හිමි වූ බව ද චරිත් අසලංක පැවසුවා.
එමෙන්ම ශ්‍රී ලංකා කණ්ඩායමේ ජයග්‍රහණයට දඟ පන්දු බලඇණිය විශාල පිටුවහලක් වූ බවත්; ඊට හේතුව මෙරට ක්‍රිකට් තරග ජයගැනීම සඳහා දඟ පන්දුවෙන් ලබාගත හැකි ප්‍රයෝජන අතිමහත් බව ද චරිත් අසලංක වැඩිදුරටත් කියා සිටියා.
ඊයේ දිනයේ දී කුසල් මෙන්ඩිස්ගේ ප්‍රවේගකාරී පිතිහරඹය ද නායක අසලංකගේ ප්‍රශංසාවට මෙහිදී ලක් වුණා.
