යහළුවන් සමග දිය නෑමට ගොස් සිටි 15 හැවිරිදි ශිෂ්‍යයෙකු දියේ ගිලී මියගොස් ඇති බව කොටදෙණියාව පොලිසිය පවසනවා.
දසත ප්‍රාදේශීය වාර්තාකරු පැවසුවේ; මියගොස් ඇත්තේ එරබද්ධ – කොටදෙණියාව පදිංචිව සිටි රත්නායක මුදියන්සේලාගේ දූෂාන් හේරත් නමැති පාසල් සිසුවෙකු බවයි.
සිසුන් හයදෙනෙකු කොටදෙණියාව හල්ඔලුව ප්‍රදේශයේ බොරළු කැපීමෙන් ඇති වූ ජලය පිරුණු වළක දිය නෑමට ගොස් තිබෙනවා.
දිය නාමින් සිටියදී මෙම සිසුවා එකවරම දියෙහි ගිලී නොපෙනී ගොස් ඇති බවයි පැවසෙන්නේ.
මේ බව දුටු සෙසු මිතුරන් කෑ ගසා ඇති අතර එම කෑගැසිල්ල ඇසී එම ස්ථානයට පැමිණි අසල්වැසි පුද්ගලයින් විසින් දියේ ගිලුණු සිසුවා ගොඩගෙන මීරිගම රෝහලට ඇතුළත් කිරීමට කටයුතු කර තිබෙනවා.
කොටදෙණියාව පොලිසිය විසින් අදාළ සිසුවා ව සිය පොලිස් ජීප් රියෙන් ම රෝහල්ගත කිරීමට කඩිනමින් කටයුතු කළ ද රෝහල්ගත කරන විට ද එම දරුවා ජීවිතක්ෂයට පත්ව සිටි බවයි පැවසෙන්නේ.
මියගිය සිසුවාගේ මව විදෙස්ගතව ඇති අතර ඔහු සිය වැඩිමහල් සහෝදරියගේ නිවසේ ජීවත් ව සිට තිබෙනවා.
කොටදෙණියාව පොලීසිය වැඩිදුර පරීක්ෂණ පවත්වනවා.
