ඉන්දියානු සංචිත බැංකුව (RBI) විසින් නිකුත් කරන ලද දත්ත වලට අනුව සැප්තැම්බර් 27 න් අවසන් සතිය තුළ ඉන්දියාවේ විදේශ විනිමය සංචිත ප්‍රථම වරට ඩොලර් බිලියන 700 සීමාව ඉක්මවා ගොස් තිබෙනවා.
ඒ අනුව චීනය, ජපානය සහ ස්විට්සර්ලන්තයට පසුව විදේශ සංචිත ඩොලර් බිලියන 700 ඉක්මවන ලොව සිව්වන ආර්ථිකය බවට ඉන්දියාව පත්වුණා.
සැප්තැම්බර් 27න් අවසන් වූ සතියේ වැඩි වීම ඩොලර් බිලියන 12.6 ක්.
එය 2023 ජූලි 14 න් පසු සතියක වාර්තා වූ ඉහළ අගයයි.
විශ්ලේෂකයින් අනාවැකි පළ කරන්නේ 2026 මාර්තු වන විට ඉන්දියාවේ සංචිත ඩොලර් බිලියන 745 දක්වා ළඟා වනු ඇති බවයි.
ඉන්දියාවේ සංචිත ප්‍රථමයෙන් ඩොලර් බිලියන 100 ඉක්මවා ගියේ 2003 දෙසැම්බර් මාසයේදී වන අතර, ඊළඟ ඩොලර් බිලියන 100 එකතු කිරීමට වසර තුනකට වැඩි කාලයක් ගත වුණා.
කෙසේ වෙතත්, තුන්වන ඩොලර් බිලියන 100 (ඩොලර් බිලියන 200 සිට ඩොලර් බිලියන 300 දක්වා) වසරකට අඩු කාලයකදී අත්පත් කර ගනු ලැබුවා.
ඩොලර් බිලියන 200 සිට ඩොලර් බිලියන 300 දක්වා වැඩි වීම වේගවත්ම වර්ධනය වන අතර එය මාස දහයකින් පමණ සිදු වුණා.
Bloomberg වෙතින් ලබාගත් දත්ත වලට අනුව, එය ඩොලර් බිලියන 300 සිට ඩොලර් බිලියන 400 දක්වා ඉහළ යාමට වසර නවයකට වැඩි කාලයක් ගත වී තිබෙනවා.
