ඌව විශ්වවිද්‍යාල මායිමේ පිහිටි ගැනෙල්පින්වත්ත හා ගිගුරුගමුව රක්ෂිතය තුළ ගින්නක් හටගෙන තිබෙනවා.
ඊයේ (23) රාත්‍රියේ මෙම ගින්න පැතිර ගොස් ඇති බවයි අප ප්‍රාදේශීය වාර්තාකරු පැවසුවේ.
කෙසේවෙතත් ගින්න පැය කිහිපයක් තුළ පාලනය කිරීමට හැකි වූ බව ආපදා කළමනාකරණ මධ්‍යස්ථානයේ බදුල්ල දිස්ත්‍රික් සහකාර අධ්‍යක්ෂ ඊ. එම් .එල් උදයකුමාර මහතා ප්‍රකාශ කර තිබෙනවා.
කෙසේවෙතත් රක්ෂිතයේ අක්කර 10ක පමණ කොටසක් ගින්නෙන් පිළිස්සී ගොස් ඇති බවත් වාර්තා වනවා.
ගින්නට හේතුව අනාවරණය වී නැතත් පවත්නා වියළි කාලගුණයත් සමග කිසියම් පිරිසක් රක්ෂිතයට ගිනි තබන්නට ඇතැයි සැක පළ කරනවා.
ගින්න පාලනය කිරීම සඳහා එළදලුව යුද හමුදා කඳවුරේ නිලධාරීන්, ගිනි නිවීම් ඒකකය, විදුලි බල මණ්ඩලය, ඌව විශ්ව විද්‍යාලයේ ප්‍රධාන පරිපාලන නිලධාරිතුමා සහ ආරක්ෂක අංශය, ආපදා කළමනාකරණ මධ්‍යස්ථාන නිලධාරීන් ඇතුළු පිරිසක් සහයෝගය දී තිබෙනවා.
