සැප්තැම්බර් 21 වැනි දින පැවැත්වීමට නියමිත ඉදිරි ජනාධිපතිවරණයත් සමඟ එක්සත් ජනපද රාජ්‍ය දෙපාර්තමේන්තුව ශ්‍රී ලංකාව සඳහා වන සංචාරක උපදේශන යාවත්කාලීන කර තිබෙනවා.
ඒ, අනුව රට තුළ සිවිල් නොසන්සුන්තාවයේ සහ ත්‍රස්තවාදයේ වැඩි අවදානමක් පවතින බව සඳහන් කරන එක්සත් ජනපද රාජ්‍ය දෙපාර්තමේන්තුව ශ්‍රී ලංකාවේ සංචාරය කරන ඇමරිකානු පුරවැසියන්ට ප්‍රවේශම් සහගතව කටයුතු කරන ලෙස දැනුම් දෙනවා.
එමෙන්ම මැතිවරණයට පෙර, අතරතුර හෝ පසුව විරෝධතා, පෙළපාලි ඇතිවිය හැකි බැවින් ඇතැම් අවස්ථාවල එවැනි රැස්වීම් සුළු හෝ අනතුරු ඇඟවීමකින් තොරව ප්‍රචණ්ඩකාරී විය හැකි බවයි පේනවා දෙන්නේ.
එහිදී විරෝධතාකරුවන් විසුරුවා හැරීමට පොලිසිය ජල ප්‍රහාර සහ කඳුළු ගෑස් ප්‍රහාර එල්ල කිරීමට කටයුතු කරන බව ද එම දෙපාර්තමේන්තුව එරටින් පැමිණෙන සංචාරකයින්ට දැනුම් දී තිබෙනවා.
ඒ, අනුව සාමකාමී රැස්වීම්වලින් පවා වැළකී සිටින ලෙස මෙරට සංචාරයේ නිරතවන එක්සත් ජනපද පුරවැසියන්ට නිකුත් කළ නව උපදේශන මාලාවේ දැක්වෙනවා.
දුරස්ථ ප්‍රදේශවල සිටින එක්සත් ජනපද පුරවැසියන්ට හදිසි සේවා සැපයීමට එක්සත් ජනපද රජයට සීමිත හැකියාවක් පවතින බවයි රාජ්‍ය දෙපාර්තමේන්තුව පවසන්නේ.
ශ්‍රී ලංකාවට යාමට තීරණය කරන්නේ නම් සංචාරක ස්ථාන සහ ජනාකීර්ණ පොදු ස්ථාන වෙත ගමන් කරන විට වටපිටාව ගැන අවධානයෙන් සිටින ලෙසට ද මෙමඟින් දැනුම් දී තිබෙනවා.
එමෙන්ම පළාත් පාලන ආයතනවල උපදෙස් අනුගමනය කරන ලෙසත්, ප්‍රාදේශීය මාධ්‍ය නිරීක්ෂණය කරන්න ලෙසත්, නව තොරතුරු මත පදනම්ව සංචාරක සැලසුම් සකස් කරන ලෙසටත් දැනුම් දෙනවා.
