සී.සී.ටී.වී. දර්ශන මගින් ඇල්ලූ බයික් හොරකම

‍යතුරුපැදි සහ ත්‍රීරෝද රථයක් සොරකම් කළ පුද්ගලයින් දෙදෙනකු කහතුඩුව පොලිසිය විසින් අත්අඩංගුවට ගනු ලැබුවා.

මෙම යතුරුපැදි සහ ත්‍රීරෝද රථයෙහි වටිනාකම රුපියල් ලක්ෂ 50කට ආසන්න බවයි වාර්තා වන්නේ.

සැකකරුවන් මෙම සොරකමෙහි නියැලී ඇත්තේ කහතුඩුව, කැස්බෑව, බුලත්සිංහල, ගාල්ල හා කළුතර පොලිස්වසම්වල දී බවයි පැවසෙන්නේ.

සැකකරුවන් ව සීසීටීවී දර්ශන අනුව විමර්ශන සිදු කිරීමෙන් පසුව පොලිසිය විසින් අත්අඩංගුවට ගනු ලැබුවා.

ඉකුත් මාස තුනක කාලය තුළ මෙම සොරකම් සිදුකර ඇති අතර අත්අඩංගුවට ගත් ප්‍රධාන සැකකරු හොරණ ප්‍රදේශයේ ඉවතලන යකඩ අබලි යකඩ මිල දී ගන්නා පුද්ගලයකු බවත් පොලිසිය පවසනවා.

සැකකරු දහවල් කාලයේ දී අබලි ද්‍රව්‍ය එකතු කරන මුවාවෙන් විවිධ ප්‍රදේශවල සැරිසරමින් රැස්කරගන්නා තොරතුරු අනෙක් සැකකරු වෙත ලබාදීමෙන් අනතුරුව ඔහු විසින් සොරකම් කර රැගෙන එන ලද යතුරුපැදි සඳහා රුපියල් 30,000ක මුදලක් ලබාදීම ප්‍රධාන සැකකරු විසින් සිදු කර තිබූ බවයි හෙළි ව ඇත්තේ.

ඔහු විසින් එම යතුරුපැදිවල චැසි සහ එන්ජින් අංක මකා විවිධ පුද්ගලයන් වෙත අලෙවි කර තිබූ බවත් වාර්තා වනවා.

ඊට අමතරව යතුරුපැදි පිටින් රුපියල් ලක්ෂ 06-07 වටිනා යතුරුපැදි ඉතා අඩු මුදලකට හොරණ ප්‍රදේශයේ විවිධ පුද්ගලයන් වෙත විකුණා තිබියදී සොයා ගැනීමට හැකි වූ බවයි පොලිසිය පැවසුවේ.

කහතුඩුව පොලිසිය වැඩිදුර පරීක්ෂණ සිදු කරනවා.