ජංගම දුරකථන තොගයක් සමග සැකකරුවෙකු අත්අඩංගුවට

විදෙස් රටකින් තීරුබදු රහිතව රැගෙන ආ බවට සැක කෙරෙන ජංගම දුරකථන තොගයක් සමග එක් සැකකරුවෙකු කරඹ මාර්ග බාධකයේ දී අත්අඩංගුවට ගෙන තිබෙනවා.

අද (28) උදෑසන පොලිස් නිලධාරීන් හා නාවික හමුදා නිලධාරීන් පිරිසක් විසින් කරඹ මාර්ග බාධකයේ සිදු කරන ලද පරීක්ෂා කිරීම්වල දී බොලොරෝ වර්ගයේ කැබ් රථයක තිබී මෙම ජංගම දුරකථන තොගය සොයා ගැනුණා.

එහිදී පෙට්ටි කිහිපයක බහා තිබූ Nokia වර්ගයේ ජංගම දුරකථන 600ක්, SanIlan වර්ගයේ ස්මාර්ට් ජංගම දුරකථන 50ක් හමු වී ඇති බවයි අප ප්‍රාදේශීය මාධ්‍ය වාර්තාකරු සඳහන් කළේ.

මේ පිළිබඳව කැබ් රථ රියදුරුගෙන් ප්‍රශ්න කිරීමේ දී පවසා ඇත්තේ, මෙම තොගය පෑලියගොඩ ප්‍රදේශයේ සිලොන් සිෆින් ආයතනයට අයත් බවයි.

මේ පිළිබඳව කිසිඳු ලියකිවිල්ලක් ඉදිරිපත් කිරීමට අපොහොසත් වීම නිසා වැඩිදුර විමර්ශන කිරීමට මෙම ජංගම දුරකථන තොගය නොරොච්චෝලේ පොලිසියට භාර දී තිබෙනවා.

සිද්ධිය සම්බන්ධයෙන් අත්අඩංගුවට ගත් තැනැත්තා කැකිරාව මරදන්කඩවල ප්‍රදේශයේ පදිංචිකරුවෙක්.

මෙම ජංගම දුරකථන තොගය තීරුබදු රහිතව හෝ වෙනත් අකාරයෙන් මෙරටට ගෙන්වා ඇති දැයි සොයා බැලීමට නොරොච්චෝලේ පොලීසිය පරීක්ෂණයක් ආරම්භ කර තිබෙනවා.