බංග්ලාදේශ අග්‍රාමාත්‍ය ෂීක් හසීනා අගමැති ධුරයෙන් ඉල්ලා අස් වී තිබෙනවා.
අද (05) දහවල් අග්‍රාමාත්‍යවරිය තම ධුරයෙන් ඉල්ලා අස් වී ඇති බවයි වාර්තා වන්නේ.
බංග්ලාදේශ අගමැතිනි හසීනා ඇතුළු එරට රජයට වහාම ඉල්ලා අස්වෙන ලෙස බල කරමින් ශිෂ්‍ය කණ්ඩායම් සහ සිවිල් ක්‍රියාකාරීන් පසුගියදා දැවැන්ත රාජ්‍ය විරෝධී උද්ඝෝෂණ මාලාවක් රට පුරා ආරම්භ කළා.
එම උද්ඝෝෂණ වඩාත් ප්‍රචණ්ඩකාරී ස්වරූපයක් ගැනීම හේතුවෙන් ඊයේ (04) දිනය වන විට පොලිස් නිලධාරීන් ඇතුළු විරෝධතාකරුවන් 90 දෙනෙකු ජීවිතක්ෂයට පත් ව ඇති බවයි විදෙස් මාධ්‍ය වාර්තා සඳහන් කළේ.
එවන් පසුබිමකදියි බංග්ලාදේශ අගනුවර වන ඩකා නිල නිවසේ රැඳී සිටිමින්, ධුරයෙන් ඉවත් ව ආරක්ෂිත ස්ථානයක් කරා ගොස් ඇති බවටත් තොරතුරු වාර්තා වුණේ.
කෙසේවෙතත් එරට මාධ්‍ය වාර්තා කරන පරිදි ෂීක් හසීනා අග්‍රාමාත්‍යවරිය රටින් හොර රහසේ ම පලා ගොස් ඇති බවටත් තොරතුරු වාර්තා වනවා.
එම මාධ්‍ය වාර්තා පෙන්වාදෙන පරිදි ඇය ඩකා අගනුවර සිට සිය සහෝදරිය සමග ඉන්දියාවට හෙලිකොප්ටරයකින් ගොස් ඇති බවයි වාර්තා වන්නේ.
කෙසේවෙතත් තව ස්වල්ප වේලාවකින් එරට හමුදා ප්‍රධානිය ජාතිය ඇමතීමට සූදානම් බවයි පැවසෙන්නේ.
