එළඹෙන වසරේ පැවැත්වෙන (2025) පන්දුවාර 20 ක්‍රිකට් ලෝක කුසලානය සඳහා ශ්‍රී ලංකා තුන් ඉරියව් ක්‍රීඩක ඇන්ජිලෝ මැතිව්ස්ගේ එක් වීමක් සිදු නොකරන බව ශ්‍රී ලංකා ක්‍රිකට් තේරීම් කමිටුවේ සභාපති උපුල් තරංග පවසනවා.
අද (24) පැවති විශේෂ මාධ්‍ය සාකච්ඡාවකට එක්වෙමිනුයි සභාපතිවරයා මේ බව සඳහන් කළේ.
මාධ්‍යවේදියෙකු උපුල් තරංගගෙන් විමසා සිටියේ ලංකා ප්‍රීමියර් ලීග් තරගාවලියේ ද විශිෂ්ට අන්දමින් තරග අවසන් කරන්නෙකු ලෙස දැකිය හැකි වූ ඇන්ජිලෝ මැතිව්ස් මෙම සතියේ ආරම්භ වීමට නියමිත ඉන්දීය T20 තරගාවලිය සඳහා එක් නොකර ගත්තේ මන්ද යන්නයි.
එම අවස්ථාවේදී උපුල් තරංග සඳහන් කළේ; තමන් ඇතුළු ක්‍රිකට් තේරීම් කමිටුව ද මීට පෙර ඇන්ජිලෝ මැතිව්ස් සමග ඔහුගේ T20 ක්‍රිකට් ජීවිතයේ ඉදිරිය සම්බන්ධයෙන් සාකච්ඡා කළ බවත්; ඉදිරි ලෝක කුසලානයට ඇන්ජිව එක් කරගැනීමට අදහසක් ශ්‍රී ලංකා ක්‍රිකට් තේරීම් කමිටුව සතුව නැති බවයි.
නවක ක්‍රීඩකයින් හට අවස්ථාවක් ලබාදීම වෙනුවෙන් සහ ඔවුන් ව ලබන වසරේ T20 ලෝක කුසලානයට සූදානම් කරවීම වෙනුවෙන් මෙම බැරෑරුම් තීරණය ගෙන ඇති බව ද හෙතෙම පැවසුවා.
එමෙන්ම ලංකා ප්‍රීමියර් ලීග් තරගාවලියේ දී ඇන්ජලෝ මැතිව්ස් දැක්වූ දක්ෂතා ගැන ද සහාපති උපුල් තරංග ප්‍රශංසා කළ අතර; ඔහු සතු තුන් ඉරියව් දක්ෂතා සංචිතයෙන් ගැලවීම මහත් හිස්තැනක් සේ දකින බවත්; ඊට කඩිනමින් විසඳුම් සෙවීමට නවක ක්‍රීඩකයින් ව හුරු කරවීම අවශ්‍ය බවත් ඔහු මාධ්‍ය හමුවේ දී වැඩිදුරටත් කියා සිටියා.
