ඇමෙරිකා එක්සත් ජනපදයේ 2023 ඔලිම්පියා ඇමේචර් ( Olimpia Amateur ) ජාත්‍යන්තර කායවර්ධන ශූරතා තරගාවලියට වයස අවුරුදු 35 බිකිනි අංශයෙන් තරග වැද; එහි තුන්වන ස්ථානයත්, එහි ලෝක ශූරතා තරගාවලියේ බී කාණ්ඩය යටතේ පැවති බෙන් වීඩර් නැචුරල්ස් ( Ben Weider Naturals ) තරගාවලියේ දී දෙවන ස්ථානයත් දිනාගත් දිල්රුක්ෂි ආරච්චිගේ ක්‍රීඩිකාව මෙරටට පැමිණ තිබෙනවා.
අද (08) උදෑසන මෙම ක්‍රීඩිකාව කටුනායක ජාත්‍යන්තර ගුවන් තොටුපොළ වෙත පැමිණි බවයි වාර්තා වන්නේ.
මෙම ඔලිම්පියා ඇමේචර් කායවර්ධන තරගාවලිය ලෝකයේ රටවල් 70ක ක්‍රීඩිකාවන් 380 දෙනෙකුගේ පමණ සහභාගීත්වයෙන් ඇමෙරිකා එක්සත් ජනපදයේ වොෂින්ටන් ඩී.සී. නුවර දී පැවැත්වුණා.
ලෝක ශූරතා බෙන් වීඩර් නැචුරල්ස් තරගාවලිය ලෝකයේ රටවල් 110ක; ක්‍රීඩිකාවන් 180 දෙනෙකුගේ සහභාගීත්වයෙන් ඇමෙරිකා එක්සත් ජනපදයේ ඔලැන්ඩෝ නුවරදීයි පැවැත්වීමට කටයුතු යොදා තිබුණේ.
ලෝකයේ ඉහළම ශ්‍රේණිගත කිරීම් අනුව ඔලිම්පියා ඇමේචර් කායවර්ධන ශූරතා තරගාවලිය ලෝකයේ අංක 01ට පත් වී තිබෙන අතර, මෙම තරගාවලිය සඳහා ශ්‍රී ලංකාව නියෝජනය කරමින් සහභාගී වන එකම ක්‍රීඩිකාව වන්නේ ද දිල්රුක්ෂි ආරච්චිගේ පමණක් වීම ද විශේෂත්වයක්.
ඇය මෙම ජයග්‍රහණ රැගෙන අද උදෑසන 08.30 ට ඩුබායි සිට එමිරේට්ස් ගුවන් සේවයේ EK- 650 දරන ගුවන් යානයෙන් කටුනායක ගුවන් තොටුපොළ වෙත පැමිණි බවයි අප ගුවන් තොටුපොළ වාර්තාකරු පැවසුවේ.
මොවුන් දෙදෙනා පිළිගැනීම සඳහා දිල්රුක්ෂි ආරච්චිගේ සොහොයුරු සොහොයුරියන්, මෙන් ම ශ්‍රී ලංකා කායවර්ධන සම්මේලනයේ නිලධාරීන් පිරිසක් ද පැමිණ සිටියා.
