පිටකොටුව බැස්ටියන් මාවතේ පුද්ගලික බස් නැවතුම්පොලේ බස් රථයක් තුළ දී බ්රිතාන්ය ජාතික තරුණියකගේ ගමන් මල්ලක් හා මුදල් සොරකම් කිරීමේ සිද්ධිය සම්බන්ධයෙන් අත්අඩංගුවට ගත් සැකකරු ලබන 07 වනදා දක්වා රක්ෂිත බන්ධනාගාර ගත කරන ලෙස කොළඹ මහේස්ත්රාත් අධිකරණය නියම කළා.
පිටකොටුව පොලිසිය විසින් අදාළ සැකකරු කොළඹ අතිරේක මහේස්ත්රාත් පසන් අමරසේන මහතා හමුවට අද (31) ඉදිරිපත් කරනු ලැබුවා.
සැකකරු විසින් සොරා ගත් බව කියන බ්රිතාන්ය ජාතික තරුණිට අයත් ලැප්ටොප් පරිගණකය, කැමරාව, බැංකු කාඩ්පත් සහ ඇයගේ විදේශ ගමන් බලපත්රය ඇතුළු ද්රව්යයන් පොලිසිය විසින් අධිකරණයට ඉදිරිපත් කර තිබුණා.
සිද්ධියට අදාළ විමර්ශන තවදුරටත් සිදුකරන බවට පොලිසිය විසින් ඉදිරිපත් කළ කරුණු සලකා බැලූ අතිරේක මහේස්ත්රාත්වරයා අනතුරුව සැකකරු ලබන 07 වනදා දක්වා රක්ෂිත බන්ධනාගාර ගත කිරීමට නියෝග කළා.
මෙම සිද්ධිය සම්බන්ධයෙන් අදාළ බස් රථයේ සවි කර තිබූ ආරක්ෂිත කැමරා ඔස්සේ සිදුකළ විමර්ශනයකින් අනතුරුව මෙම සැකකරු පොලිසිය විසින් අත්අඩංගුවට ගෙන තිබුණා.
අදාළ විදෙස් තරුණිය ඇල්ල බලා පිටත්වයාම සඳහා පිටකොටුව බැස්ටියන් බස් නැවතුම්පොලේ බස් රථයට ගොඩ වී සිටින අවස්ථාවේ මෙම සොරකම සිදුවී ඇති බවත් පොලිසිය අධිකරණයට වාර්තා කළා.
