ඝාතනයකට සැරසුණු අපරාධකරුවන් දෙදෙනෙක් අත්අඩංගුවට (ඡායාරූප)

ඝාතනයක් සිදුකිරීම සඳහා ටී- 56 වර්ගයේ ගිනි අවියක් ඇතුළු ආයුධ කිහිපයක් රැගෙන යමින් සිටි පුද්ගලයින් දෙදෙනෙක් අත්අඩංගුවට ගෙන තිබෙනවා.

කළුතර කොට්ඨාස දූෂණ මර්ධන වැටලීම් ඒකකය විසින් මෙම සැකකරුවන් දෙදෙනා මෝටර් රථයකින් යමින් සිටිය දී මෙලෙස අත්අඩංගුවට ගෙන ඇති බවයි වාර්තා වුණේ.

මෙලෙස අත්අඩංගුවට ගෙන ඇත්තේ දෙල්ගොඩ වීරප්පන් සහ බාජා නැමැති අන්වර්ථ නාමවලින් හඳුන්වන සැකකරුවන් දෙදෙනෙක්.

දෙල්ගොඩ සිට අඟුරුවාතොට දෙසට ගමන්කළ මෝටර් රථයක් නාර්තුපාන පාලම ආසන්නයේ නවතා පරීක්ෂා කිරීමේ දී
මෙම සැකකරුවන් අත්අඩංගුවට ගැනීමට හැකි වූ බවයි පොලිසිය පැවසුවේ.

එහිදී ටී- 56 වර්ගයේ ගිනි අවියට අමතරව උණ්ඩ 28ක් සහිත මැගසීනයක්, කඩු 02ක්, අත්බෝම්බ 02ක් සහ හෙරොයින් මත්කුඩු ග්‍රෑම් 11ක් ද සොයාගත් බවයි පොලිසිය සඳහන් කළේ.

අනතුරුව ප්‍රධාන සැකකරුගේ නිවස පරීක්ෂා කිරීමේ දී තවත් කඩු 05ක්, වායු රයිෆලයක් සහ ගල්කටස් වර්ගයේ ගිනිඅවියක් සොයාගෙන තිබෙනවා.

සැකකරුවන් මතුගම මහේස්ත්‍රාත් අධිකරණය ඉදිරිපත් කර රැඳවුම් නියෝග ලබාගැනීමට නියමිත බවයි වාර්තා වුණේ.

.