පුද්ගලයෙකු විසින් පිරිමි ළමයෙකුගේ ගුද මාර්ගයට වායු සම්පීඩකයකින් (කම්පෙෂර්) වායුව ඇතුළු කිරීමෙන් පසු එම ළමයා මිය යාමේ පුවතක් අසල්වැසි ඉන්දියාවේ පූනේ හි හදප්සාර් ප්‍රදේශයෙන් වාර්තා වනවා.
මෙලෙස මියගොස් ඇත්තේ වයස අවුරුදු 16ක පිරිමි ළමයෙක් බවයි තොරතුරු වාර්තා වුණේ.
හදප්සාර් කර්මාන්තපුරයේ, විවිධ පිටි වර්ග නිෂ්පාදනය කරන කර්මාන්ත ශාලාවක් තුළ දී පසුගිය සඳුදා මෙම සිදුවීම සිදුව තිබෙනවා.
අදාළ පුද්ගලයා විසින් විහිළුවක් සිදුකිරීමට ළමයාගේ පසුපස ප්‍රදේශයට වායු සම්පීඩකයේ බටය අල්ලා ඇති අතර, එම අවස්ථාවේ දී ළමයාගේ ගුද මාර්ගය ඔස්සේ විශාල වායු ප්‍රමාණයක් ශරීරය අභ්‍යන්තරයට ගොස් තිබෙනවා.
එහිදී ළමයාගේ උදරය ඉදිමීමත් සමඟ ඔහුව රෝහල් ගත කිරීමට කටයුතු කර ඇති බවයි තොරතුරු අනාවරණය වී ඇත්තේ.
කෙසේ වෙතත් ශරීර අභ්‍යන්තරයේ තුවාල සිදුවීම හේතුවෙන් රෝහල් ගත කළ ළමයා අවාසනාවන්ත ලෙස ජීවිතක්ෂයට පත්ව ඇති බවයි ඉන්දීය මාධ්‍ය වැඩිදුරටත් තොරතුරු වාර්තා කර තිබුණේ.
මෙම සිද්ධියට සම්බන්ධ ගවුඩ් නැමති 21 හැවිරිදි පුද්ගලයෙක් අත්අඩංගුවට ගැනීමට කටයුතු කර තිබෙනවා.
