අමෙරිකාවේ බොස්ටන් සහ උතුරු වර්ජිනියා හි මහල් නිවාස සංකීර්ණයෙන් පිටත ගණිකා මඩම් ජාලයක් පවත්වාගෙන යාම සම්බන්ධයෙන් පුද්ගලයින් තිදෙනෙකුට චෝදනා එල්ල කර තිබෙනවා.
විදෙස් මාධ්‍ය පැවසුවේ අමෙරිකානු රජයේ නීති පාර්ශ්වය විසින් මෙම චෝදනා ගොනු කරනු ලැබූ බවයි.
මෙම ගණිකා මඩම් ජාලයේ ගනුදෙනුකරුවන් අතර තාක්ෂණික නිලධාරීන්, ඖෂධ විධායකයින්, නීතිඥයින්, මහාචාර්‍යවරුන් සහ හමුදා නිලධාරීන් ද සිටින බවයි වාර්තා වන්නේ.
මෙම බොස්ටන් ප්‍රදේශයෙහි ඇති ගණිකා මඩම්වල සිදුවන ලිංගික ජාවාරම් සහ ලිංගික සූරාකෑම් සම්බන්ධයෙන් වැඩි වශයෙන් ආසියාතික කාන්තාවන් හට ලිංගික සබඳතා සඳහා පැයකට ඩොලර් 600ක් දක්වා ගෙවන බවටත් හෙළි ව තිබෙනවා.
මේ සඳහා බොහෝ සෙයින් වත්කම් සහිත පුද්ගලයින් එක් ව ඇති බවයි හෙළි ව ඇත්තේ.
මෙම ගණිකා මඩම් මෙහෙයවන්නන් ලෙස චෝදනා ලැබ ඇත්තේ මැසචුසෙට්ස් හි 41 හැවිරිදි හැන් ලී,
30 හැවිරිදි ජුන්මියුන්ග් ලී සහ කැලිෆෝනියාවේ 68 හැවිරිදි ජේම්ස් ලී හට යි.
මොවුන් විසින් කාන්තාවන්ට නීතිවිරෝධී ලිංගික ක්‍රියාකාරකම්වල යෙදීමටත් බල කිරීම සහ ඒවාට පොළඹා ලීමට කටයුතු කර ඇති බවටත් හෙළි ව තිබෙනවා.
වැඩබලන එක්සත් ජනපද නීතිඥ ජොෂ් ලෙවී පැවසුවේ පරීක්ෂණ ආරම්භ වී ඇති බවත්; මැසචුසෙට්ස්, වර්ජිනියා සහ කැලිෆෝනියා යන ස්ථානවල සෝදිසි වරෙන්තු ක්‍රියාත්මක කිරීමෙන් පසු නීතිය ක්‍රියාත්මක කිරීමට තවදුරටත් සාක්ෂි එක් කරගනිමින් සිටින බවයි.
