ළමා මන්දපෝෂණය සම්බන්ධ ව රාජ්‍ය ආයතන ඉදිරිපත් කරන සංඛ්‍යාමය වාර්තාවලින් රටේ පවත්නා සැබෑ තත්ත්වය අනාවරණය නොවන බව පාර්ලිමේන්තු විශේෂ කාරක සභාවේ දී හෙළි ව තිබෙනවා.
ඊට එක්වෙමින් පාර්ලිමේන්තු මන්ත්‍රී වඩිවේල් සුරේෂ් සඳහන් කළේ පෝෂණ අවශ්‍යතා සහිත දරුවන් පිරිස නිවැරදිව ම හඳුනාගෙන වාර්තාවක් ලබාදීමට අදාළ රාජ්‍ය ආයතන කටයුතු කළ යුතු බවයි.
වතුකරයේ ගර්භණී මවුවරුන්ගේ මානසික පීඩාවන් අලුත උපදින දරුවන්ගේ සෞඛ්‍යයට ඍජුව ම බලපාන බව ද මෙහිදී අනාවරණය වුණා.
ශ්‍රී ලංකාවේ ළමා මන්දපෝෂණ තත්ත්වය වැඩි වෙමින් පවතින්නේ ද, යන්න සොයා බැලීමටත්, එසේ නම් ඒ සඳහා ගත යුතු කෙටිකාලීන, මධ්‍යකාලීන හා දිගුකාලීන ක්‍රියාමාර්ග පිළිබඳ ව සොයා බැලීම සඳහාත්, හඳුනාගත් ක්‍රියාමාර්ග කඩිනමින් ක්‍රියාවට නැංවීම පිළිබඳ ව අධීක්ෂණය කිරීම සඳහාත් මෙහිදී විශේෂ කරුණු රැසක් කෙරෙහි අවධානය යොමු කෙරුණු බවයි පාර්ලිමේන්තු සන්නිවේදන අංශය නිවේදනයක් නිකුත් කරමින් සඳහන් කරන්නේ.
ළමා මන්ද පෝෂණය සම්බන්ධ ව පවතින නිවැරදි ම දත්ත අයවැයට පෙර කාරක සභාව වෙත ලබාදීමට කටයුතු කරන ලෙසත් ඒ ඔස්සේ ළමා මන්ද පෝෂණය තුරන් කිරීම සම්බන්ධයෙන් පොදු යෝජනාවලියක් පාර්ලිමේන්තුවට ඉදිරිපත් කිරීමට අවකාශය සැලසෙන බවත් කාරක සභාව නිලධාරීන්ට පෙන්වා දුන්නා.
