ඉදිරි අයවැය සඳහා කෘෂිකර්ම ක්ෂ්රේත්රයේ ගොවීන්ගේ අභිවෘද්ධිය වෙනුවෙන් යෝජනා ඉදිරිපත් කර ඇති බවත්, ඒ සඳහා යහපත් ප්රතිචාරයක් ලැබෙනු ඇතැයි විශ්වාස කරන බවත් කෘෂිකර්ම හා වැවිලි කර්මාන්ත අමාත්ය මහින්ද අමරවීර පවසනවා.
අනුරාධපුර, රාජාංගනය ප්රදේශයේ පැවති උත්සවයකින් අනතුරුව මාධ්ය වෙත අදහස් දක්වමින් අමාත්යවරයා මේ බව සඳහන් කළා.
එහිදී වැඩිදුරටත් අදහස් දැක්වූ අමාත්යවරයා,
“විදේශීය ධීවරයන්ට අපේ මුහුදු සීමාවේ මසුන් මැරීමේ කටයුතු සඳහා බලපත්රයක් ලබා දී නෑ, බලපත්රයක් දීමේ අවශ්යතාවකුත් නෑ, හිටපු ධීවර අමාත්යයවරයා විදිහට මේ ප්රශ්නය නිරාකරණය කරන්න වැඩපිළිවෙලක් මම සකස් කළා, අනවසරයෙන් කරන කටයුත්තට අවසරයක් දීමේ අවශ්යතාවක් තියනවා කියලා මම හිතන්නේ. මේ පිළිබඳව සාකච්ඡාවක් කරලා එකඟතාවකට ඒම හොඳයි, කොහොමත් ඒ ගොල්ල මත්ස්යයින් ඇල්ලීම කරනවානේ, ඒක නීති විරෝධී ආකාරයෙන්
කරන්නේ පරිසරයටත්, පොළවටත් හානී වන විදිහට නමුත් ඒ අයට බලපත්රයක් දීම පිළිබඳව තවම අවසන් එකඟතාවකට ඇවිල්ලා නෑ,ඉල්ලීමක් විතරයි ඇවිත් තියෙන්නේ.
වතු කම්කරුවන්ට සාධාරණයක් වෙන්න ඕන කියන මතයේ මම ඉන්නවා. කර්මාන්තයත් කඩා නොවැටී එම කර්මාන්ත පවත්වාගෙන යාමේ අවශ්යතාව තියෙනවා. තේ කර්මාන්තය කඩා වට්ටාගෙන පඩි වැඩි කිරීමෙන් තේරුමක් නෑ, දෙගොල්ල එක්ක සාකච්ඡා කරලා සාමූහික තීන්දුවක් ගැනීමයි වැදගත් වෙන්නේ.ඉදිරියේදී ඒ සාකච්ඡාවන් සිදුකරන්න බලාපොරොත්තු වෙනවා. මේ වසරේ පළමු වතාවේ විදුලි බිල වැඩි වුණා, දෙවැනි වතාවේ අඩු වුණා, දැන් තුන්වැනි වතාවේ නැවත විදුලි බිල වැඩි වීමක් තියෙනවා, කාටවත් මේ වැඩි වීම හොඳයි කියලා කියන්න පුලුවන්කමක් නෑ, මේ ජීවන තත්ත්වය අමාරුයි, මිනිස්සු අමාරුවෙන් ජීවත් වෙන්නේ. නමුත් වෙන විසඳුමක් නැති නිසා තමයි මේ තත්වයට ඇවිත් තියෙන්නේ. ඉදිරියේ දී ඒ සඳහා ජනතාවට කුමන ආකාරයෙන් හෝ සහනයක් දිය යුතුයි කියන මතයේ මම ඉන්නවා.
ඉදිරි අයවැය සඳහා කෘෂිකර්ම ක්ෂ්රේත්රයේ ගොවීන්ගේ අභිවෘද්ධිය වෙනුවෙන් යෝජනා ඉදිරිපත් කරලා තියෙනවා, මම විශ්වාස කරනවා ඒ සඳහා යහපත් ප්රතිචාරයක් ලැබෙයි කියලා.රටේ මූල්ය තත්ත්වය පිළිබඳවත් අපි දන්නවා, ආර්ථිකය පිළිබඳවත් අපි දන්නවා, ඒ තත්ත්වය තුළ වුණත් මේ වසරේ අපිට උදව් කළා, වගේම මහා භාණ්ඩාගාරයත් ජනාධිපතිතුමත්, ලබන වසරේදීත් ඒ උදව්ව ලැබෙයි කියලා මම විශ්වාස කරනවා, ජනාධිපතිතුමන් හා මහා භාණ්ඩාගාරය රජයේ සේවකයින්ට හා අනෙක් අයටත් යම් සහනයක් ලබාදීම ගැන අවධානය යොමු කරලා තියෙනවා.”
