මෙරට මුහුදු සීමාව තුළ අනවසරයෙන් ධීවර කර්මාන්තයේ නිරත වූ ඉන්දීය ධීවරයන් 37 දෙනෙකු නාවික හමුදා අත්අඩංගුවට ගෙන තිබෙනවා.
ඊයේ සවස සහ අද අලුයම සිදු කළ මෙහෙයුම් මගිනුයි යාත්රා 5ක් සමග මෙම ධීවරයන් අත්අඩංගුවට ගෙන ඇත්තේ.
මන්නාරමට ඔබ්බෙන් වූ මෙරට මුහුදු ප්රදේශයේ සහ යාපනය, ඩෙල්ෆ්ට් දූපතට ඔබ්බෙන් වූ මෙරට මුහුදු ප්රදේශයේ වේග ප්රහාරක යාත්රා, වෙරළබඩ මුර යාත්රා සහ කුඩා යාත්රා යොදවා මෙම මෙහෙයුම් සිදු කර තිබෙනවා.
එහිදී, මන්නාරමට ඔබ්බෙන් වූ මෙරට මුහුදු සීමාවේ අනවසර ධීවර කටයුතු සිදු කරමින් සිටි ඉන්දීය ධීවර යාත්රා 3ක් සමඟ ඉන්දීය ධීවරයින් 23 දෙනෙකු උතුරු මැද නාවික විධානය මඟින් අත්අඩංගුවට ගනු ලැබුවා.
යාපනය, ඩෙල්ෆ්ට් දූපතට ඔබ්බෙන් වූ මෙරට මුහුදු සීමාවේ අනවසර ධීවර කටයුතු සිදු කළ ඉන්දීය ධීවර යාත්රා 2ක් සමඟ ඉන්දීය ධීවරයින් 14 දෙනෙකු උතුරු නාවික විධානය මඟින් නාවික හමුදා භාරයට ගෙන තිබෙනවා.
මෙම මෙහෙයුම් මඟින් නාවික හමුදා භාරයට ගත් ඉන්දීය ධීවර යාත්රා 05 සහ එහි සිටි ඉන්දීය ධීවරයින් 37 දෙනා තලෙයිමන්නාරම ජැටිය සහ කන්කසන්තුරය වරාය වෙත රැගෙන ආ අතර, ඉදිරි නීතිමය කටයුතු සඳහා තලෙයිමන්නාරම සහ යාපනය ධීවර පරීක්ෂක කාර්යාල වෙත භාර දීමට නියමිතයි.
නාවික හමුදාව සඳහන් කළේ මෙම මෙහෙයුමත් සමඟින් නාවික හමුදාව විසින් 2023 වසරේ මේ දක්වා සිදුකළ මෙහෙයුම් මඟින් මෙරට මුහුදු සීමාවේ අනවසර ධීවර කටයුතු සිදුකළ ඉන්දීය ධීවර යාත්රා 27ක් සහ ඉන්දීය ධීවරයින් 174ක් තම භාරයට ගෙන ඉදිරි නීතිමය කටයුතු සඳහා යොමු කර ඇති බවයි.
