අවිස්සාවේල්ල – තල්දූව ප්‍රදේශයෙ දී තිරෝද රටයකින් ගමන්ගත් පුද්ගලයින් සිව්දෙනෙකුට වෙඩි ප්‍රහාරයක් එල්ලකර ඉන් දෙදෙනෙකු ඝාතනය කිරීමේ සිද්ධිය සම්බන්ධයෙන් පසුගිය දා අත්අඩංගුවට ගැනුණු සැකකරු අද (15) අලුයම් කාලයේ දී ජීවිතක්ෂයට පත්ව තිබෙනවා.
පොලීසිය සමඟ සිදුවූ පොරබැදීමකදී මෙම සැකකරු මෙලෙස ජීවිතක්ෂයට පත්ව ඇති බවයි අප වාර්තාකරු සඳහන් කළේ.
මෙලෙස මියගොස් ඇත්තේ අදාළ වෙඩි තැබීමේ සිද්ධියේ දී වෙඩික්කරු සමඟ යතුරුපැදිය පැදවූ පුද්ගලයා බවයි වාර්තා වුණේ.
මෙම සැකකරු පසුගිය දා (12) හම්බන්තොට, කටුවැව හන්දිය ප්‍රදේශයේ දී හෙරොයින් මත්ද්‍රව්‍ය සමඟ පොලිස් විශේෂ කාර්ය බලකාය විසින් අත්අඩංගුවට ගෙන තිබුණා.
පසුව ඔහු හම්බන්තොට පොලිසිය වෙත භාරදීමෙන් පසු විමර්ශන සඳහා අවිස්සාවේල්ල පොලිසිය වෙත රැගෙන එනු ලැබුවා.
එහිදී වැඩිදුර දින තුනක් රැදවුම් නියෝග ලබාගෙන ප්‍රශ්න කිරීම සඳහා පොලිසිය අධිකරණයෙන් අවසර ලබාගෙන තිබුණා.
එලෙස සිදුකළ ප්‍රශ්න කිරීම වලදී අනාවරණය වූ කරුණු අනුව නඩු භාණ්ඩ කිහිපයක් පොලිස් භාරයට ගැනීම සඳහා අද (15) අලුයම් කාලයේ අවිස්සාවේල්ල පොලිස් වසමේ මානියංගම, ඇත්පන්තිය පාර ප්‍රදේශයට සැකකරු රැගෙන ගොස් ඇති බවයි වාර්තා වන්නේ.
එහිදී සැකකරු විසින් ඔහුගේ අත්විලංගුවෙන් එහි සිටි පොලිස් නිලධාරියෙකුගේ ගෙළ සිරකර ඇති අතර, එම අවස්ථාවේ දී පොලිස් නිලධාරීන් විසින් එය වැලැක්වීමට උත්සාහ ගෙන තිබෙනවා.
එම උත්සාහ කිරීමේ දී පොලිස් නිලධාරියාට සහ සැකකරුට තුවාල සිදුව ඇති අතර, ඔවුන් දෙදෙනාම අවිස්සාවේල්ල රෝහල වෙත ඇතුළත් කිරීමටයි පියවර ගෙන ඇත්තේ.
එහිදී සැකකරු මියගොස් ඇති අතර, පොලිස් නිලධාරියා රෝහල් ගතව ප්‍රතිකාර ලබන බවයි වාර්තා වුණේ.
