ඩුබායි හි Expo City හි පැවැත්වෙන දේශගුණික විපර්යාස පිළිබඳ එක්සත් ජාතීන්ගේ රාමු සම්මුතියේ (COP28) පාර්ශවයන්ගේ සමුළුවට සහභාගී වන ලෙස එක්සත් අරාබි එමීර් රාජ්‍යයේ (UAE) ජනාධිපති Mohamed bin Zayed Al Nahyan මහතා විසින් ජනාධිපති රනිල් වික්‍රමසිංහ මහතාට ආරාධනා කර තිබෙනවා.
එක්සත් අරාබි එමීර් රාජ්‍යයේ ජනාධිපතිවරයා විසින් යොමු කරන ලද ආරාධනා පත්‍රය ශ්‍රී ලංකාවේ එක්සත් අරාබි එමීර් රාජ්‍යය තානාපති Khaled Nasser Al Ameri විසින් ජනාධිපති වික්‍රමසිංහ වෙත නිල වශයෙන් භාර දුන් බවයි එක්සත් අරාබි එමීර් රාජ්‍යයේ විදේශ කටයුතු අමාත්‍යාංශය පවසන්නේ.
මෙම වසර ආරම්භයේදී ද ජනාධිපති Mohamed bin Zayed Al Nahyan විසින් එමිරේට්ස් දේශගුණික සමුළුව ආරම්භ කරන ප්‍රධාන උත්සවයක් වන ලෝක දේශගුණික ක්‍රියාකාරී සමුළුවට සහභාගී වන ලෙස ජනාධිපති වික්‍රමසිංහ වෙත ආරාධනාවක් ද සිදු කරනු ලැබුවා.
ලෝක දේශගුණික ක්‍රියාකාරී සමුළුවේ නායකයින්ගේ උත්සවය දෙසැම්බර් 1 සහ 2 යන දිනවල පැවැත්වීමට නියමිත අතර එය එක්සත් අරාබි එමීර් රාජ්‍යයේ 52 වැනි ජාතික දින සැමරුම් උත්සවයට සමගාමීවයි සිදු වන්නේ.
එක්සත් අරාබි එමීර් රාජ්‍යය ප්‍රධානත්වයෙන් නොවැම්බර් 30 සිට දෙසැම්බර් 12 දක්වා එක්ස්පෝ සිටි ඩුබායි හි දේශගුණ විපර්යාස පිළිබඳ එක්සත් ජාතීන්ගේ රාමු සම්මුතියේ (UNFCCC) පාර්ශවකරුවන්ගේ සම්මේලනයේ 28 වැනි සැසිවාරය ක්‍රියාත්මක කෙරෙනවා.
