මීට වසර තුන හමාරකට පෙර හදාවඩා ගැනීමට ගත් දැරියකට අමානුෂික ලෙස වද හිංසා සිදුකළ වෛද්‍ය යුවළක් ගුවහාටිහිදී ඉන්දීය පොලිසිය විසින් පසුගිය සෙනසුරාදා අත්අඩංගුවට ගෙන ඇති බව වාර්තා වනවා.
මෙම වෛද්‍ය යුවළ පදිංචිව සිටි නිවස ආසන්නේ ජීවත් වූ අසල්වැසියෙක් සිදුකර ලද පැමිණිල්ලකට අනුවයි සැකකාර යුවළ මෙලෙස අත්අඩංගුවට ගෙන ඇත්තේ.
මේ වනවිට සිව්හැවිරිදි වියේ පසුවන දැරියකට මොවුන් විසින් මෙලෙස දිගින් දිගටම වධ හිංසා පමුණුවා ඇති බව අනාවරණය වී තිබෙනවා.
එලෙස වධ හිංසා සිදුකළ දැරිය නිවසේ උඩු මහලේ කණුවක බැඳ තිබූ අවස්ථාවක අසල්වැසිය විසින් ඡායාරූපයක් ලබාගෙන එයද පොලිසිය වෙත ඉදිරිපත් කරමින් මෙම පැමිණිල්ල සිදුකර ඇති බවයි ඉන්දීය මාධ්‍ය වාර්තා කළේ.
අනතුරුව සැකකාර වෛද්‍ය යුවළ අත්අඩංගුවට ගෙන ඇති අතර, මෙලෙස අත්අඩංගුවට පත් වෛද්‍යවරයා ශල්‍ය වෛද්‍යවරයකු වන අතර වෛද්‍යවරිය මනෝ වෛද්‍යවරියක් බවයි වාර්තා වන්නේ.
කලක සිට ඔවුන් දෙදෙනා විසින් මෙලෙස හදාවඩා ගැනීමට ගත් දැරියට වධ හිංසා සිදුකර ඇති අතර, ඊට ඔවුන්ගේ නිවසේ මෙහෙකාරිය ද සහාය වී ඇති බවයි හෙළිව ඇත්තේ.
පොලිසිය විසින් ප්‍රශ්න කිරීමේ දී වෛද්‍යවරයා පාපොච්චාරණය කර ඇත්තේ තමන් දැරියට යකඩ පොල්ලකින් පහරදී ඇගේ සිරුරට උණුවතුර වත් කළ බවයි.
අකීකරු සහ නපුරු වීම නිසා දැරියට දඬුවම් කිරීම සඳහා ඇයව නිවසේ උඩු මහලේ ගැට ගසන ලෙස වෛද්‍ය යුවළ තමාගෙන් ඉල්ලා සිටි බවට නිවසේ මෙහෙකාරිය ද පොලිසිය හමුවේ පාපොච්චාරණය කර තිබෙනවා.
සැකකාර වෛද්‍ය යුවළට මීට පෙර ද දැරිය අපයෝජනයට ලක් කරන බවට පැමිණිලි ලැබී තිබුණ ද නිසි සාක්ෂියක් ඉදිරිපත් නොවීම හේතුවෙන් ඔවුන්ව අත්අඩංගුවට ගැනීමට හැකිව නැහැ.
