20 හැවිරිදි විවාහක තරුණියක් ඝාතනය කළ මාමා කෙනෙකු ඝාතනය සඳහා භාවිත කළ ගිනි අවිය ද සමඟ පොලිසියට පැමිණ භාර වූ පුවතක් ඉන්දියාවෙන් වාර්තා වනවා.
උත්තර් ප්‍රදේශ් ප්‍රාන්තයේ, සිටාපූර් ප්‍රදේශයේ දී මෙම ඝාතනය සිදුව ඇති අතර, පොලිසියට භාර වූ සැකකාර මාමා පොලිසියට පවසා ඇත්තේ මෙය “ගෞරවනීය ඝාතනයක්” බවයි.
ඝාතනයට ලක්වූ තරුණිය ඉන්දියාව තුළ පහත් යැයි සැලකෙන කුලයක අයෙකු සමඟ විවාහ වීම නිසා කෝපයට පත් ඇයගේ මාමා විසින් ඊයේ (06) මෙම ඝාතනය සිදුකර ඇති බවයි එරට මාධ්‍ය වාර්තා කළේ.
අදාළ තරුණිය ජීවත් වූ ප්‍රදේශයේ සිටි රූපචන්ද්‍ර මෞර්‍ය නමැති විවාහක පුද්ගලයෙකු සමඟ අනියම් ඇසුරක් පවත්වාගෙන ගොස් තිබෙනවා.
පසුව රූපචන්ද්‍ර විසින් පසුගිය නොවැම්බර් මාසයේදී තරුණිය සමඟ ප්‍රදේශයෙන් පළාගොස් තිබූ අතර, අනතුරුව ඔවුන් දෙදෙනා විවාහ වී ඇති බවටයි තොරතුරු වාර්තා වන්නේ.
විවාහයෙන් ටික කලකට පසු යළින් මොවුන් පෙර පදිංචිව සිටි ප්‍රදේශයට පැමිණ ඇති අතර, එලෙස පැමිණ සිටි අතර තුරයි තරුණියව මෙලෙස ඝාතනයට ලක්ව ඇත්තේ.
තරුණියගේ ඝාතනය සම්බන්ධයෙන් ඇයගේ මාමාට සහ ඔහුගේ බාල පුත්‍රයා ඇතුළු පවුලේ අයට එරෙහිව රූපචන්ද්‍රගේ පවිලේ අය විසින් පැමිණිල්ලක් ද පොලිසියට ගොනුකර තිබෙනවා.
සිදුකළ විමර්ශන වලදී අනාවරණය වී ඇත්තේ තරුණිය පැන ගොස් විවාහ වූ පසු ඝාතනය කිරීමට සැකකාර මාමා විසින් සැලසුම් කර ඇති බවයි.
