වැල්ලවාය කෝන්ගහරූප්ප ප්‍රදේශයේ දී පුද්ගලයෙකු විසින් තම වැඩිමහල් සොහොයුරාට තියුණු ආයුධයකින් පහරදී ඝාතනය කර තිබෙනවා.
ඉඩම් ආරවුලක් සම්බන්ධයෙන් ඇති වූ ගැටලුවක් මත මෙම ඝාතනය සිදු වී ඇති අතර මියගොස් ඇත්තේ එම ප්‍රදේශයේ ම පදිංචි වයස අවුරුදු තිස් හතරක් වන තිදරු පියෙක්.
ඝාතනය සිදු කළ සැකකරු පොලිසිය විසින් අත්අඩංගුවට ගෙන ඇති අතර ඔහු එම ප්‍රදේශයේ ම පදිංචි වයස අවුරුදු 25ක තරුණයෙක්.
මෙම සහෝදරයින් දෙදෙනා විවාහයෙන් පසු එකම නිවසක ජීවත් වී ඇති අතර විටින් විට එම නිවස සම්බන්ධයෙන් ඔවුන් අතර අඩදබර ඇති වී ඇති බවයි හෙළිවන්නේ.
පසුව අවස්ථා රැසක දීම මේ සම්බන්ධයෙන් පොලිසියට ද පැමිණිලි කර ඇති අතර ඊයේ උදෑසන කාලයේ දී ද මේ සම්බන්ධයෙන් පොලිසියට පැමිණිල්ලක් සිදු කර තිබෙනවා.
එම පැමිණිල්ල සම්බන්ධයෙන් උරණ වූ සැකකරු ඊයේ රාත්‍රි මෙම ප්‍රහාරය සිදු කර ඇති අතර බරපතළ තුවාල ලැබූ පුද්ගලයා වැල්ලවාය මූලික රෝහලට ඇතුළත් කිරීමෙන් පසු මියගොස් ඇතැයි සඳහන්.
අත්අඩංගුවට ගත් සැකකරු වැල්ලවාය මහේස්ත්‍රාත් අධිකරණයට ඉදිරිපත් කිරීමට නියමිත අතර සිද්ධිය සම්බන්ධයෙන් වැල්ලවාය පොලිසිය විමර්ශන සිදු කරනවා.
