කැබිනට් සංශෝධනයක් අලුත් අවුරුද්දෙන් පසු ?

අමාත්‍ය මණ්ඩල සංශෝධනයක් සිංහල හා දෙමළ අලුත් අවුරුදු සමයෙන් පසු සිදුකිරීමට නියමිත බවට වාර්තා පළ වනවා.

ආණ්ඩුවේ සහ විපක්ෂයේ පළපුරුදු දේශපාලනඥයන් කිහිප දෙනෙකුට මෙහිදී කැබිනට් අමාත්‍ය ධුර ලැබීමට නියමිත බවයි වාර්තා වන්නේ.

සමගි ජන බලවේගයේ මන්ත්‍රීවරුන් සහ මීට පෙර ආණ්ඩුවෙන් ඉවත් වූ මන්ත්‍රීවරුන් කිහිප දෙනෙකු රජයට එක්වීමට නියමිත බව ද සඳහන්.

කෙසේවෙතත් ආණ්‌ඩුක්‍රම ව්‍යවස්‌ථාවට අනුව පත් කිරීමට හැකියාව පවතින්නේ කැබිනට්‌ අමාත්‍යවරුන් 30 දෙනකු පමණයි.

20 වැනි ආණ්ඩුක්‍රම ව්‍යවස්ථා සංශෝධනයට අනුව කැබිනට් මණ්ඩලය තිස් දෙනකුගෙන් සමන්විත වන අතර, ඉන් 20 දෙනෙක් දැනටමත් පත්ව සිටිනවා.

අමාත්‍ය මණ්ඩල සංශෝධනයේදී, ඉතිරි වී ඇති අමාත්‍ය ධුර 10 සඳහා ශ්‍රී ලංකා පොදුජන පෙරමුණේ සහ සමගි ජන බලවේගයේ මන්ත්‍රීවරුන් පිරිසක් අතර දැඩි තරගයක් නිර්මාණය වී ඇතැයි ද රජයේ ආරංචි මාර්ග පවසනවා.

සිදු කෙරෙන අමාත්‍ය මණ්ඩල සංශෝධනයේදී, අලුතින් අමාත්‍යවරුන් 10 දෙනෙකු පත් කිරීමට අවස්ථාව ලැබෙන අතර එම අමාත්‍ යධුර සඳහා දැඩි තරගයක් නිර්මාණය වී ඇති බවටයි වාර්තා වන්නේ.

අමාත්‍ය ධූර සදහා ශ්‍රී ලංකා පොදුජන පෙරමුණෙන් රෝහිත අබේගුණවර්ධන, ජොන්ස්ටන් ප්‍රනාන්දු, සී බී රත්නායක, ජනක බණ්ඩාර තෙන්නකෝන්, විමලවීර දිසානායක ඇතුළු මන්ත්‍රීවරුන් 8 දෙනකුගේ පමණ නම් යෝජනා වී ඇතැයි සඳහන්.

සමගි ජන බලවේගයේ මන්ත්‍රී රාජිත සේනාරත්න මහතා ඇතුළු මන්ත්‍රීවරුන් කිහිප දෙනෙකු ද ආණ්ඩුවට එක්වී අමාත්‍ යධූර ලබාගැනීමට අපේක්ෂාවෙන් සිටින බවටයි වාර්තා වනවා.

සෞඛ්‍ය අමාත්‍ය ධුරය ලබා දෙන්නේ නම් එය බාර ගැනීමට තමා සූදානම් බව රාජිත සේනාරත්න මහතා දැනටමත් ප්‍රකාශ කර ඇති අතර, සෞඛ්‍ය අමාත්‍යවරයා ලෙස කටයුතු කරන කෙහෙළිය රඹුක්වැල්ල ඒ සම්බන්ධයෙන් මෙතෙක් එකඟතාවක් පළ කර නොමැති බවටයි වාර්තා වී ඇත්තේ.

එමෙන්ම සමගි ජන බලවේගයේ ජ්‍යෙෂ්ඨයන් කිහිප දෙනකු ඇතුළු මන්ත්‍රීවරුන් පිරිසක් ආණ්ඩුවට එක්වීමට සූදානමින් සිටින බව ද දේශපාලන ආරංචි මාර්ග ප්‍රකාශ කර තිබෙනවා.