පොලිස් දෙපාර්තමේන්තුවට එරෙහිව මූලික අයිතිවාසිකම් උල්ලංඝනය කිරීම සම්බන්ධයෙන් විවිධ පාර්ශව විසින් පෙත්සම් 1521 ක් පමණ ඉදිරිපත් කර ඇති බව නීතිපතිවරයා අද ශ්‍රේෂ්ඨාධිකරණය හමුවේ ප්‍රකාශ කළා.
මහාචාර්ය අර්ජුන පරාක්‍රම මහතා විසින් ගොනු කරන ලද මූලික අයිතිවාසිකම් පෙත්සමක් ඊයේ සලකා බැලීම සඳහා ශ්‍රේෂ්ඨාධිකරණය හමුවේ කැඳවනු ලැබූ අවස්ථාවේදී නීතිපතිවරයා වෙනුවෙන් පෙනී සිටි ජේෂ්ඨ රජයේ නීතිඥ ෂමින්ද වික්‍රම මහතා මෙම දැනුම් දීම සිදු කළා.
“පොලිස් දෙපාර්තමේන්තුවට එරෙහිව ශ්‍රේෂ්ඨාධිකරණය හමුවේ මේ වනවිට මූලික අයිතිවාසිකම් පෙත්සම් 1521 ක් විවිධ පාර්ශව විසින් ගොනු කර තිබෙනවා,එම පෙත්සම් වල අන්තර්ගත කරුණු වල සත්‍ය අසත්‍යතාව නිවැරදි ලෙස තහවුරු කරගැනීමෙන් අනතුරුව අවශ්‍ය නියෝග නිකුත් කරන ලෙස මා ඉල්ලා සිටිනවා” යනුවෙන් ජේෂ්ඨ රජයේ නීතිඥවරයා අධිකරණයෙන් අයැද සිටියා.
මහාචාර්ය අර්ජුන පරාක්‍රම මහතා විසින් ඉදිරිපත් කළ පෙත්සම මගින් සඳහන් කර තිබුණේ ඉකුත් ජනවාරි මස 20 වනදා වත්මන් ආර්ථික අර්බුදයට විසඳුම් ලබාදෙන ලෙස ඉල්ලා කොළඹ විශ්ව විද්‍යාලයේ සිට ගාලුමුවදොර මුදල්අමාත්‍යාංශය දක්වා වෘත්තිකයින් විසින් පා ගමනක් සංවිධානය කර තිබූ බවයි.
නිත්‍යානුකූල ලෙස සාමකාමීව සිදු කළ එම පෙළපාලියට පොලිසිය විසින් විවිධ අවස්ථාවල හිරිහැර හා බාධා කිරීම් සිදු කළ බවටත් ඒ තුළින් නිදහසේ අදහස් ප්‍රකාශ කිරීමේ මූලික මිනිස් අයිතිය ඇතුළු මූලික අයිතිවාසිකම් උල්ලංඝනය කළ බවටත් චෝදනා කරමින් කොටුව සහකාර පොලිස් අධිකාරි නලීන් දිල්රුක්, කොටුව පොලිසිය ස්ථානාධිපතිවරයා, ප්‍රදේශය භාර ජ්‍යෙෂ්ඨ පොලිස් අධිකාරීවරයා, බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් ඇතුළු පිරිසක් වගඋත්තරකරුවන් කරමින් මහාචාර්ය අර්ජුන පරාක්‍රම මහතා විසින් මෙම පෙත්සම ගොනුකර තිබුණා.
එම අවස්ථාවේදී වගඋත්තරකරුවන් වෙනුවෙන් පෙනී සිටි ජේෂ්ඨ රජයේ නීතිඥ ශමින්ද වික්‍රම මහතා අධිකරණය හමුවේ ඉල්ලීමක් කරමින් මෙම නඩුවට අදාළව සීමිත විරෝධතා ඉදිරිපත් කිරීම සඳහා දිනයක් ලබාදන ලෙස ඉල්ලා සිටියා.
ඒ අනුව වගඋත්තරකරුවන්ට සීමිත විරෝධතා ඉදිරිපත් කිරීම සඳහා අප්‍රේල් මස 28 වන දා දක්වා කල් ලබා දුන් ශ්‍රේෂ්ඨාධිකරණය මැයි මස 31 වනදා අදාළ පෙත්සම සලකා බැලීම සිදුකරණ බවට නියෝග කළා.
