මත්ද්රව්ය ජාවාරමෙන් උපයා ගත් මුදල්වලින් තරුණියක් සහ තවත් පුද්ගලයෙකු මිලදී ගත් බව කියන වැලිවේරිය ප්රදේශයේ රුපියල් කෝටි දෙකක් පමණ වටිනා ඉඩම සහ නිවස ගම්පහ මහාධිකරණ නියෝග මත රාජසන්තක කර තිබෙනවා.
රුපියල් කෝටියකට අධික මත්කුඩු තොගයක් සමග අත්අඩංගුවට ගත් පුද්ගලයෙකු සහ ඔහුගේ පෙම්වතිය සම්බන්ධයෙන් මුදල් විශුද්ධි කිරීමේ පනත යටතේ සිදු කළ විමර්ශනවලින් අනාවරණය වූ තොරතුරු අනුව මෙම පියවර ගත් බවයි අපරාධ පරීක්ෂණ දෙපාර්තමේන්තුවේ නීතිවිරෝධී වත්කම් විමර්ශන කොට්ඨාසය සඳහන් කර ඇත්තේ.
කොළඹ අපරාධ කොට්ඨාසය මගින් 2021 වසරේ ජූලි මස 19 වෙනි දින මත්ද්රව්ය කිලෝ එකයි ග්රෑම් 225 ක් සහ එම ජාවාරමෙන් උපයා ගත් බව කියන රුපියල් 869,800 මුදලක් සමග මිරිහාන රජමහා විහාර මාවත පදිංචි සැකකරුවෙක් සහ ඔහුගේ පෙම්වතිය බව කියන බොරැල්ල සර්පන්ටයින් පාර පදිංචි තරුණියක් අත්අඩංගුවට ගනු ලැබුවා.
සැකකරු සහ සැකකාරිය සම්බන්ධයෙන් මුදල් විශුද්ධිකරණ වැළැක්වීමේ පනත යටතේ විමර්ශනයක් සිදුකරන ලෙස පොලිස්පතිවරයා සිදුකළ නියෝගයක් අනුව සිදු කළ විමර්ශනවලින් අනතුරුවයි මත්ද්රව්ය ජාවාරමෙන් උපයා ගත් මුදල් වලින් එම නිවස මිලදී ගත් බවට අනාවරණ වී ඇත්තේ.
නීති විරෝධී ආකාරයට උපයා ගත් මුදල්වලින් මිලදී ගත් දේපළ සම්බන්ධයෙන් 2011 අංක 40 පනතින් සංශෝදිත මුදල් විශුද්ධිකරණ වැළැක්වීමේ පනතේ 8 (2) වගන්තිය ප්රකාරව මෙම නිවස ඉඩම ගම්පහ මහාධිකරණය මගින් ක්රියා විරහිත කර තහනම් කිරීමට ලක් කර ඇති අතර එම පනතේ එකොළොස් වන වගන්තිය ප්රකාරව මහර ප්රාදේශීය ලේකම් එම නිවසේ ප්රතිග්රාහකයා වශයෙන් පත්කළ බව පොලිසිය සඳහන් කළා.
මත්ද්රව්ය ජාවාරම සම්බන්ධයෙන් වැලිකඩ බන්ධනාගාරයේ රඳවා සිටින සැකකාරිය බන්ධනාගාර නිලධාරීන්ගේ ආරක්ෂාව මැද එම නිවස වෙත කැඳවා තිබූ අතර ඇය ඉදිරියේ එම නිවස සෝදිසි කිරීම සඳහා වරෙන්තුවක් ද නිකුත් කර තිබූ බව සඳහන්.
මෙම සැකකරු සහ සැකකාරියගේ නමින් බැංකු කිහිපයක තැන්පත්ව ඇති රුපියල් කෝටි 11කට ආසන්න මුදල් සම්බන්ධයෙන් ද විමර්ශන සිදුකරන බව නීති විරෝධී වත්කම් විමර්ශන කොට්ඨාසයේ නිලධාරියෙක් ප්රකාශ කර තිබෙනවා.
