ලබන 8 සහ 9 යන දිනවල ජිනීවා නුවර පැවැත්වීමට නියමිත සිවිල් සහ දේශපාලන අයිතිවාසිකම් පිළිබඳ ජාත්යන්තර සම්මුතියේදී (ICCPR) ශ්රී ලංකාව පිළිබඳ සමාලෝචනයක් සිදු කිරීමට නියමිතව තිබෙනවා.
විදේශ කටයුතු අමාත්යංශය පවසන්නේ රටවල් 173ක් නියෝජනය කරන මෙම සම්මුතිය සදහා ශ්රී ලංකාව වෙනුවෙන් ජිනීවා නුවර එක්සත් ජාතීන්ගේ සංවිධානයේ ශ්රී ලංකා නිත්ය නියෝජිත හිමාලී අරුණතිලක මහත්මිය නායකත්වය ලබා දෙන බවයි.
ජනාධිපති ලේකම් කාර්යාලය, මහජන ආරක්ෂක අමාත්යංශය, නීතිපති දෙපාර්තමේන්තුව, විදේශ කටයුතු අමාත්යංශය සහ ජිනීවා නුවර එක්සත් ජාතීන්ගේ සංවිධානයේ ශ්රී ලංකා නිත්ය දූත මණ්ඩලය නියෝජනය කරන ජ්යෙෂ්ඨ නිලධාරීන් පිරිසක් මෙම අවස්ථාවට සහභාගි වන අතර අධිකරණ, බන්ධනාගාර කටයුතු සහ ආණ්ඩුක්රම ව්යවස්ථා ප්රතිසංස්කරණ අමාත්යංශය, ආරක්ෂක අමාත්යංශය, කාන්තා, ළමා කටයුතු හා සමාජ සවිබල ගැන්වීම් අමාත්යංශය, සෞඛ්ය අමාත්යංශය, බන්ධනාගාර දෙපාර්තමේන්තුව, පොලිස් දෙපාර්තමේන්තුව, අතුරුදන්වූවන් පිළිබඳ කාර්යාලය (OMP), හානිපූර්ණය සඳහා වන කාර්යාලය (OR) සහ ජාතික සමගිය සහ සංහිඳියාව පිළිබඳ කාර්යාලය (ONUR) යන ආයතන නියෝජනය කරමින් ජ්යෙෂ්ඨ නිලධාරින් පිරිසක් මෙම සමාලෝචනය සඳහා කොළඹ සිට සම්බන්ධ වීමට නියමිතයි.
ශ්රී ලංකාව 1980 ජුනි 11 වැනි දින සිවිල් සහ දේශපාලන අයිතිවාසිකම් පිළිබඳ ජාත්යන්තර සම්මුතිය සමඟ එක් වූ අතර 1983, 1990, 1994, 2003, 2013, 2019 යන වර්ෂවලදී වාරික වාර්තා 06ක් ඉදිරිපත් කර 1983, 1991, 1995, 2003 සහ 2014 යන වර්ෂවලදී සමාලෝචන 05කට සහභාගි වී තිබෙනවා.
සිවිල් සහ දේශපාලන අයිතිවාසිකම් පිළිබඳ ජාත්යන්තර සම්මුතිය ස්වාධීන විශේෂඥයින් 18 දෙනෙකුගෙන් සමන්විත කමිටුවකින් අධීක්ෂණය වන අතර 137 වැනි සැසිය අතරතුර ශ්රී ලංකාවට අමතරව, ඊජිප්තුව, ටර්ක්මෙනිස්තානය,සැම්බියාව, පේරු සහ පැනමාව යන රාජ්යයන් ද සමාලෝචනය කිරීමට නියමිතයි.
