නව පාර්ලිමේන්තු සැසිවාරය ආරම්භ කිරීම වෙනුවෙන් පෙරහුරුවක් හෙට (06) පැවැත්වෙනවා.
පාර්ලිමේන්තු නව සැසිවාරය ජනාධිපති රනිල් වික්‍රමසිංහ මහතාගේ ප්‍රධානත්වයෙන් ලබන 08 වනදා ආරම්භ කිරීමට නියමිතයි.
ඉතා චාම් සහ සරල ලෙස පාර්ලිමේන්තු නව සැසිවාරය විවෘත කිරීමට කටයුතු සලසන ලෙසටයි ජනාධිපතිවරයා විසින් උපදෙස් ලබා දී ඇත්තේ.
නව සැසිවාරය විවෘත කරමින් පෙරවරු 10ට ජනාධිපතිවරයා රජයේ ප්‍රතිපත්ති දැක්ම ඉදිරිපත් කරනු ඇති.
නව සැසිවාරය විවාත කිරීමේ උත්සවය අඩු වියදමින් සිදුකිරීමට මේ වන විටත් කටයුතු කර ඇති අතර, ආරාධනා පත්‍ර මුද්‍රණය වෙනුවට ඒවා අන්තරජාලය ඔස්සේ යොමු කරමින් වියදම් විශාල වශයෙන් අඩු කිරීමට ද පියවර ගෙන ඇතැයි සඳහන්.
ජනාධිපති රනිල් වික්‍රමසිංහ මහතා විසින් පසුගිය ජනවාරි මස (27) මධ්‍යම රාත්‍රියේ සිට බලපැවැත්වෙන පරිදි ආණ්ඩුක්‍රම ව්‍යවස්ථාවේ 70 (1) ව්‍යවස්ථාව ප්‍රකාරව පැවරී ඇති බලතල අනුවයි පාර්ලිමේන්තුව වාරාවසාන කරනු ලැබුවේ.
මෙවැනි සැසිවාර අවසන් කිරීමකින් අනතුරුව යළි නව සැසිවාරයකට පාර්ලිමේන්තුව ආරම්භ කිරීමේ දී ජනාධිපතිවරයා විසින් සිය ප්‍රතිපත්ති ප්‍රකාශය ඉදිරිපත් කිරීම ද සාම්ප්‍රදායිකව සිදු වනවා.
ඒ අනුව 75වන නිදහස් දින සැමරුමත් සමඟ රට තුළ ක්‍රියාත්මක කිරීමට යෝජිත නව ප්‍රතිපත්ති, නව නීති හා පනත් සහ 2023-2048 කාල සීමාවේ නිදහසේ සියවස් සැමරුම දක්වා රටේ උන්නතිය වෙනුවෙන් පක්ෂ, පාට, ජාති භේදයකින් තොරව අනිවාර්යයෙන්ම ක්‍රියාත්මක කළ යුතු වැඩපිළිවෙළ පිළිබඳ එම ප්‍රතිපත්ති ප්‍රකාශය මගින් පාර්ලිමේන්තුවට ඉදිරිපත් කිරීමට නියමිතයි.
පාර්ලිමේන්තුව වාර අවසාන කළ විට එතෙක් යථාපරිදි පාර්ලිමේන්තුව විසින් සලකා නොබලන ලද ප්‍රශ්න සහ යෝජනා අහෝසි වන අතර මන්ත්‍රීවරුන් නැවත වාරයක් ඒ සම්බන්ධව ස්ථාවර නියෝග අනුව කටයුතු කළ යුතු වනවා.
තවද පාර්ලිමේන්තුවේ සම්බන්ධීකරණ කාරක සභාව, උසස් නිලතල පිළිබද කාරක සභාව , විශේෂ කාරක සභා සහ ආංශික අධීක්ෂණ කාරක සභා හැර අනෙකුත් සියලු කාරක සභා නව සභාවාරයේදී නැවත පත්කළ යුතුයි.
නවවැනි පාර්ලිමේන්තුවේ පළමු සභාවාරය 2020 අගෝස්තු 20 සිට 2021 දෙසැම්බර් 12 දක්වාත්, දෙවන සභාවාරය 2022 ජනවාරි 18 සිට 2022 ජූලි 28 දක්වාත් පවත්වා තිබෙනවා.
ඒ අනුව නව වැනි පාර්ලිමේන්තුවේ තුන්වැනි සභාවාරය 2022 අගෝස්තු 03 දින ආරම්භ වූ අතර පසුගිය (27) වාර අවසාන කරන මොහොත වන විට පාර්ලිමේන්තුව දින 58ක් රැස්වී තිබෙනවා.
