ප්‍රමුඛ පෙළේ ට්‍රක් සහ බස් රථ නිෂ්පාදකයෙකු වන අශෝක් ලේලන්ඩ් සමගම විසින් ශ්‍රී ලංකාවට බස් රථ 500ක් සැපයීමට ශ්‍රී ලංකා ගමනාගමන මණ්ඩලයෙන් (ශ්‍රී ලංගම) ඇණවුමක් ලබාගෙන ඇතැයි ඉන්දීය මාධ්‍ය වාර්තා පවසනවා.
ඒ අනුව ආසන 32 බස් රථ 500ක් සැපයීම සඳහා වන මෙම ඇණවුම ඉන්දියානු රජයේ ණය යෝජනා ක්‍රමය යටතේ ලබාදෙන බවයි ඉන්දීය මාධ්‍ය වාර්තාවල දැක්වෙන්නේ.
මීට අදාළ බස් රථ 75ක් ජනවාරි 5 වන දින ලබා දී ඇති බව අශෝක් ලේලන්ඩ් සමාගම සඳහන් කර තිබෙනවා.
“අශෝක් ලේලන්ඩ් බස් රථ 5000 කට වැඩි ප්‍රමාණයක් දැනට ලංගම සමඟ ක්‍රියාත්මක වන අතර ආසන 32 කින් යුත් මෙම නව බස් රථ දිවයින පුරා ග්‍රාමීය මාර්ගවල ධාවනයට එක් කිරීමට බලාපොරොත්තු වෙනවා” යනුවෙන් යැයි අශෝක් ලේලන්ඩ් හි ජාත්‍යන්තර මෙහෙයුම් සභාපති අමන්දීප් සිං මහතා ප්‍රකාශ කළා.
අශෝක් ලේලන්ඩ් බස් රථ සහ ට්‍රක් රථ ද ශ්‍රී ලංකාව තුළ නිෂ්පාදනය කරනු ලබන අතර, ලංකා අශෝක් ලේලන්ඩ් සන්නාමය “ශ්‍රී ලාංකිකයන් අතර ඔවුන්ගේ දෛනික ප්‍රවාහන අවශ්‍යතා සඳහා ප්‍රසිද්ධ බවයි අශෝක් ලේලන්ඩ් හි ජාත්‍යන්තර මෙහෙයුම් සභාපති සඳහන් කර ඇත්තේ.
මේ අතර රුසියානු රජයේ මැදිහත් වීමෙන් මෙරට සිදුකිරීමට බලාපොරොත්තු වන නව ආයෝජන අවස්ථා පිළිබඳ විශේෂ සාකච්ඡාවක් ශ්‍රී ලංකාවේ රුසියානු තානාපති ලෙවාන් එස්. ජගර්යාන් සහ ප්‍රවාහන, අමාත්‍ය බන්දුල ගුණවර්ධන අතර පැවැත්වුණා.
මෙහි දී මෙරට මහාමාර්ග සහ ප්‍රවාහන ක්ෂේත්‍රයේ සංවර්ධනය උදෙසා පවතින ආයෝජන අවස්ථාවන් පිළිබඳව අමාත්‍යවරයා විසින් තානාපතිවරයා දැනුවත් කර තිබෙනවා.
මෙවැනි අර්බුදකාරී අවස්ථාවක ශ්‍රී ලංකාව වෙත දක්වන සහයෝගය පිළිබඳව අමාත්‍ය බන්දුල ගුණවර්ධන රුසියානු රජය වෙත කෘතඥතාව පළ කළ අතර ප්‍රවාහන හා මහාමාර්ග ක්ෂේත්‍රයට අදාළව දෙරටටම ප්‍රතිලාභ සැලසෙන පරිදි රාජ්‍ය හා පෞද්ගලික ඒකාබද්ධ ආයෝජන ව්‍යුහයක් සකස් කිරීම පිළිබඳ අවධානය යොමු කරන ලෙස ද ඉල්ලීමක් කළා.
විදේශ කටයුතු අමාත්‍යංශයේ සහයෝගය ද ලබා ගනිමින් ඒ සඳහා අවශ්‍ය මගපෙන්වීම සිදුකිරීමට විශේෂ අවධානය යොමු කරන බවයි අමාත්‍යවරයා මෙම අවස්ථාවේ දී ප්‍රකාශ කර සිටියේ.
