ඉන්දියාවේ පළමු මිනිසුන් සහිත අභ්යවකාශ මෙහෙයුම ‘ගගන්යාන්’ දියත් කිරීමේ කාලසීමාව නැවතත් ප්රමාද වී තිබෙනවා.
එම මෙහෙයුම දියත් කිරීමේ නව කාලරාමුව වෙනස් කර ඇත්තේ 2024 සිව්වැනි කාර්තුව දක්වායි.
විෂය භාර අමාත්ය ජිතේන්ද්ර සිං ඉන්දීය පාර්ලිමේන්තුව වන ලෝක් සභාවට දන්වා සිටියේ මිනිසුන් රහිත ‘G1’ මෙහෙයුම 2023 අවසන් කාර්තුවේදී දියත් කිරීමටත්, මිනිසුන් රහිත ‘G2’ මෙහෙයුම 2024 දෙවැනි කාර්තුවේ දියත් කිරීමටත් ඉලක්ක කර ඇති බවයි.
2024 සිව්වන කාර්තුවේදී මිනිසුන් සහිත අභ්යවකාශ පියාසැරිය වන ‘H1’ මෙහෙයුම සිදු කිරීමට නියමිතයි.
ඉන්දියාවේ 75 වැනි නිදහස සැමරීම සඳහා ගගන්යාන් මෙහෙයුම මෙම වසරේදී දියත් කිරීමටයි මීට පෙර සැලසුම් කර තිබුණේ.
කෙසේ වෙතත් කොවිඩ් 19 වසංගතය සහ අනුක්රමික අගුලු දැමීම් හේතුවෙන් එය පසුබෑම් කිහිපයකට මුහුණ දුන්නා.
කාර්ය මණ්ඩල ආරක්ෂාවෙහි ඇති වැදගත්කම සැලකිල්ලට ගනිමින්, විවිධ පියාසැරි තත්ත්වයන් සඳහා කාර්ය මණ්ඩල ගැලවීමේ පද්ධතිය සහ පැරෂුට් පාදක වේගය අඩු කිරීමේ ක්රමයේ ක්රියාකාරීත්වය ප්රදර්ශනය කිරීමට මිනිසුන් රහිත පරීක්ෂණ මෙහෙයුම් දෙක සැලසුම් කර ඇති බව සිං ප්රකාශ කළා.
මානව අභ්යවකාශ පියාසැරි මෙහෙයුම් සඳහා නම් කර සිටින ගගනගාමීන් මේ වන විට බැංගලෝරයේ දී ඔවුන්ගේ විශේෂිත පුහුණුවක් ලබමින් සිටින බවද අමාත්යවරයා ප්රකාශ කළා.
කාර්ය මණ්ඩල පුහුණුවේ දෙවන අධ්යයන වාරය මේ වන විට ක්රියාත්මකයි.
