කැලයක අතරමංව සිටි පිරිමි දරුවෙක් දිනකට පසු සොයාගැනීමට පොලිසිය සහ හමුදාව එක්ව සිදුකළ මෙහෙයුමක දී හැකිව තිබෙනවා.
මුලතිව් රක්ෂිතයේ අතරමංව සිටි මොහු වැලිඔය ජනකපුර, ප්‍රදේශයේ පදිංචි 12 හැවිරිදි වියේ පස්වන දරුවෙක් බව සඳහන්.
මෙම දරුවා පසුගිය 12 වනදා කිසියම් කටයුත්තක් වෙනුවෙන් ජනකපුර ප්‍රදේශයෙන් කැලෑවට ගොස් නැවත නො පැමිණීමත් සමඟ ඔහුගේ දෙමාපියන් විසින් ඒ බව වැලිඔය පොලිසියට දැනුම් දී තිබෙනවා.
පසුව ප්‍රදේශවාසීන්ගේ සහාය ඇතිව වැලිඔය පොලිසිය සහ සිවිල් ආරක්ෂක බලකා නිලධාරීන් සහ යුද හමුදා නිලධාරීන් එක්ව අතුරුදන් වූ දරුවා සෙවීමේ මෙහෙයුමක් ආරම්භ කළ බවයි දැනගන්නට ලැබුණේ.
ජනකපුර ප්‍රදේශයෙන් කැලෑවට ඇතුළු වූ මෙම දරුවා කිලෝ මීටර් 15ක් පමණ දුරින් මුලතිව් රක්ෂිතයේ කටු පඳුරක වැටී සිටියදී සොයා ගැනීමටයි හැකිව ඇත්තේ.
අධික වර්ෂාව සහ කුසගින්න හේතුවෙන් දරුවා සොයාගන්නා අවස්ථාවේ දී දැඩිලෙස දුර්වල වී සිට තිබෙනවා.
මෙලෙස හමුවූ දරුවා පසුව ප්‍රතිකාර සඳහා යොමුකර ඇති අතර, මේ වනවිට ඔහුගේ සෞඛ්‍ය තත්ත්වය යහපත් අතට හැරෙමින් පවතින බවයි පොලිසිය වැඩිදුරටත් සඳහන් කළේ.
