පන්දුවාර විස්සයි විස්ස ලෝක කුසලාන තරගාවලියේ අවසන් මහා තරගය තවත් හෝරා කිහිපයකින් ආරම්භ වීමට නියමිතයි.
මෙවර අවසන් මහා තරග සඳහා එංගලන්තය සහ පාකිස්ථානය සුදුසුකම් ලබා සිටින අතර මෙම තරගය පැවැත්වෙන්නේ ඕස්ට්රේලියාවේ මෙල්බන් ක්රිකට් ක්රීඩාංගනයේ දීයි.
මේ අතර අද පැවැත්වෙන අවසන් මහා තරගයට බොහෝ දුරට වර්ෂාවෙන් බාධා එල්ලවිය හැකි බවට කාලගුණ අංශ මීට දින කිහිපයකට පෙර සිටම අනාවැකි පළකර තිබුණා.
කෙසේ වෙතත් මේ පිළිබඳව සැළකිල්ලට ගනිමින් අවසන් තරගයේ අමතර කාලය වැඩි කිරීමට ජාත්යන්තර ක්රිකට් කවුන්සිලය තීරණය කර ඇති බවයි වාර්තා වන්නේ.
අද (13) දිනයේ මෙල්බර්න් නුවරට වැසි ඇතිවීමේ සම්භාවිතාව 100% ප්රතිශතයක පවතින බවයි කාලගුණ වාර්තාවල දැක්වෙන්නේ.
අද තරගයට වර්ෂාවෙන් බාධා එල්ලවුවහොත් හෙට (14) දිනය තරගය පැවැත්වීමට අතිරේක දිනයක් ලෙස නම්කර තිබෙනවා.
හෙට දිනයේදීත් මෙල්බර්න් නුවරට වර්ෂාව පතිතවීමේ වැඩි අවස්ථාවක් පැවතීම හේතුවෙන් එදිනට ලබාදෙන අමතර කාලය ද පැය 04 දක්වා වැඩි කිරීමටයි තීරණය කර ඇත්තේ.
අවසන් මහා තරගයේ දී කණ්ඩායම් දෙකම අවම වශයෙන් පන්දුවාර 10 බැගින් ක්රීඩා කළ යුතු වනවා.
අද දිනයේ දී තරගයට වර්ෂාවෙන් බාධා එල්ල වී තරගය අතර මඟ නතර කිරීමට සිදුවුව හොත් හෙට දිනයේ දී, තරගය නතර කළ තැන සිට ආරම්භ කිරීමට නියමිතයි.
කෙසේ වෙතත් අතිරේක දිනය වන හෙට (14) දිනයේ දී තරගයට වර්ෂාවෙන් බාධා එල්ල වුවහොත් එංගලන්තය සහ පාකිස්ථානය මෙවර විස්සයි විස්ස සම ශූරයින් ලෙස නම් කිරීමටයි තීරණය කර ඇත්තේ.
මේ අතර මෙවර අවසන් මහා තරගයේ දී ශ්රී ලංකා නියෝජනයන් දෙකක්ද සිදුවන අතර, අද තරගයේ දී පිටියේ විනිසුරුවරයෙකු ලෙස කුමාර් ධර්මසේන කටයුතු කරන අතර තරග තීරකවරයා ලෙස රංජන් මඩුගල්ල කටයුතු කරනු ලබනවා.
