මහ කන්නයේ වගා කටයුතු සඳහා ඩීසල් ලීටර් මිලියන 72ක් අවශ්‍ය බව කෘෂිකර්ම අමාත්‍යාංශ පවසනවා.
කෘෂිකර්ම ලේකම් රෝහණ පුෂ්පකුමාර සඳහන් කළේ වී වගාවේ බිම් සකස් කිරීම හා අස්වනු නෙලීමෙි කටයුතු සඳහා මෙම ඉන්ධන ප්‍රමාණය අවශ්‍ය බවට ඇස්තමේන්තු කර ඇති බවයි.
එය ඉන්ධන බවුසර් 10,909ක ප්‍රමාණයක් බවයි ලේකම්වරයා වැඩිදුරටත් සඳහන් කළේ.
බිම් සැකසීමට ඉන්ධන ලීටර් මිලියන 40ක් සහ අස්වනු නෙලීමට ඉන්ධන ලීටර් මිලියන 32ක් මෙලෙස අවශ්‍යව ඇති බවයි කෘෂිකර්ම අමාත්‍යවරයා සහ නිලධාරීන් අතර අමාත්‍යාංශයේ පැවති සාකච්ඡාවකදී ලේකම්වරයා පෙන්වා දුන්නේ.
මේ අතර ගොවිතැනට අවශ්‍ය ඉන්ධන ලබාදීමේ කටයුතු අධීක්ෂණය සියලුම දිස්ත්‍රික් ලේකම්වරුන්ට පවරා තිබෙනවා.
එමෙන්ම කිසියම් ප්‍රදේශයක වගාවට අවශ්‍ය ඉන්ධන ගැටළුවක් පැන නැඟුනහොත් අදාළ දිස්ත්‍රික් ලේකම්වරයා හමු වී ගැටළුව විසඳා ගැනීමට හැකියාව ඇති අතර, ඛනිජ තෙල් සංස්ථාව මෙන්ම කෘෂිකර්ම අමාත්‍යාංශය ද මෙම කටයුතු සම්බන්ධීකරණය සඳහා වෙනම නිලධාරියෙක් බැඟින් පසු ගියදා පත්කරනු ලැබුවා.
