තේ වත්තක අතරමං වූ කොටි පැටවුන් දෙදෙනා

නොර්වුඩ් පොලිස් වසමට අයත් ඉන්ජස්ට්‍රි තේ වත්තේ අතරමංව සිටිය දී දින දහයක් පමණ වයසැති කඳුකර කොටි පැටවුන් දෙදෙනෙක් හමු වී තිබෙනවා.

මෙම සතුන් දෙදෙනා මවගෙන් වෙන් වී අතරමංව සිටිය දී තේ දළු නෙලමින් සිටි වතු කම්කරුවන් පිරිසක් විසින් සොයාගෙන ඇති බවයි අප වාර්තාකරු සඳහන් කළේ.

පසුව කම්කරුවන් ආරක්ෂිතව කොටි පැටවුන් දෙදෙනා රඳවාගෙන ඒ පිළිබඳව නල්ලතන්නිය වනජීවී කාර්යාලයේ නිලධාරින් වෙත දැනුම් දී තිබෙනවා.

අනතුරුව වනජිවි නිලධාරින් පැමිණ එම තේ වත්තේම කොටි පැටවුන් හමු වූ ස්ථානයට යාබදව ආරක්ෂිත ස්ථානයක සතුන් දෙදෙනා රැඳවීමට කටයුතු කර ඇති බවයි වාර්තා වුණේ.

පසුව කොටිදෙන පැමිණ පැටවුන් දෙදෙනා අවස්ථා දෙකක දී රැගෙන ගිය බවයි නල්ලතන්නිය වනජිවි කාර්යාලයේ නිලධාරින් සඳහන් කළේ.