2025 නව පාසල් වාරයට පෙර දිවයිනේ සියලු ම පාසල්වල දරුවන්ට අවශ්‍ය නිල ඇඳුම් පිරිනැමෙන බව අධ්‍යාපන අමාත්‍ය සුසිල් ප්‍රේම්ජයන්ත් පවසනවා.
අධ්‍යාපන අමාත්‍යවරයා පෙන්වාදෙන්නේ මෙම නිල ඇඳුම් 100%ක් ම චීන රජයේ ආධාර යටතේ නොමිලේ හිමිවන බවයි.
මේ හේතුවෙන් රජයට රුපියල් මිලියන 7000ක ඉතිරියක් ද පවතින බවයි අධ්‍යාපන අමාත්‍යවරයා සඳහන් කළේ.
අධ්‍යාපන අමාත්‍යවරයා, චීන තානාපති සහ එරට රජයේ අදාළ නිලධාරීන් සමඟ සාකච්ඡා කිරීමේ ප්‍රතිඵලයක් අනුවයි මෙම ප්‍රදානය හිමි ව ඇති බව අධ්‍යාපන අමාත්‍යාංශය මාධ්‍ය නිවේදනයක් නිකුත් කරමින් පැවසුවේ.
රජය විසින් ප්‍රදානයක් ලෙස 2025 නව පාසල් වාරය වෙනුවෙන් පාසල් ළමුන් ලක්ෂ 43කට අවශ්‍ය නිල ඇඳුම් සහ පිරිවෙන් 825 සඳහා අවශ්‍ය සිවුරු සියල්ල ම ඇසුරුම් කර ලබාදීමට නියමිත බවට ද වාර්තා වනවා.
ඒ අනුව,නොවැම්බර් මස 13 වන දින එහි පළමු තොගය ද, එම මස 21වන දින එහි දෙවන තොගය ද, දෙසැම්බර් මස 20 වන දින එහි තෙවන තොගය ද, ශ්‍රී ලංකාවට ලැබීමට නියමිත බව මේ වන විටත් චීන රජය විසින් තහවුරු කර ඇති බවයි පැවසෙන්නේ.
එමෙන්ම නිල ඇඳුම් තොගය 2025 නව පාසල් වාරය ආරම්භ වන ජනවාරි 20 වන දිනට පෙර බෙදාහැරීමට නියමිත ව තිබෙනවා.
මෙම ප්‍රදානය ලබා දීම පිළිබඳව චීන රජයටත් චීන තානාපතිතුමන්ටත් සිය ස්තුතිය පුද කරන බව අධ්‍යාපන අමාත්‍ය ආචාර්ය සුසිල් ප්‍රේමජයන්ත සඳහන් කර සිටියා.
