2022 ඉන්දීය ප්රිමියර් ලීග් තරගවලියේ අවසන් මහා තරගය අද රාත්රියේ අහමදාබාද් නුවර නරේන්ද්ර මෝදි ජාත්යන්තර ක්රිකට් ක්රීඩාංගනයේ දී පැවැත්වීමට නියමිතයි.
මෙවර අවසන් මහා තරගය වෙනුවෙන් සංජු සැම්සන් නායකත්වය දරණ රාජස්ථාන් රෝයල්ස් කණ්ඩායම සහ හර්දික් පාණ්ඩ්යා නායකත්වය හොබවන ගුජරාට් ටයිටන්ස් කණ්ඩායම සුදුසුකම් ලබා තිබෙනවා.
ඉන්දීය ප්රිමියර් ලීග් තරග ඉතිහාසය තුළ රාජස්ථාන් රෝයල්ස් කණ්ඩායම එක්වරක් ශූරතාවය දිනා ඇති අතර ගුජරාට් ටයිටන්ස් කණ්ඩායම මෙවර අයි.පී.එල් තරගාවලියට එක් වූ කෝඩුකාර කණ්ඩායමක් වීම විශේෂත්වයක්.
මෙවර තරගාවලිය පුරාම අති සාර්ථකම කණ්ඩායම බවට පත් වූ ගුජරාට් පිළ මූලික වටයේ තරග 14න් තරග 10කම ජයගෙන තිබීම විශේෂත්වයක්.
රාජස්ථාන් රෝයල්ස් කණ්ඩායම තරගාවලිය ආරම්භයේ යම් පසුබෑමක සිටියත් පසුව ජයග්රාහී මාවතට අවතීර්ණ වූ ඔවුන් මූලික වටය අවසන් කළේ එම වටයේ තරග 14න් තරග 09ක් ජයගෙන ප්රසාද ලකුණු සටහනේ දෙවන තැනට පත්වෙමින්.
තරගාවලියේ පළමු සුදුසුකම් ලැබීමේ තරගයේදී රාජස්ථාන් රෝයල්ස් පිළ පරාජය කරමින් ගුජරාට් ටයිටන්ස් පිළ අවසන් මහා තරගයේ සිය ස්ථානය වෙන්කරගත් අතර, 2008 වසරෙන් පසු මෙවර තරගාවලිය සිය සාර්ථකම අයි.පී.එල් තරඟාවලිය කරගත් රාජස්ථාන් ක්රීඩකයින් දෙවනවරටත් අවසන් මහා තරඟයකට පිවිසියේ රෝයල් චැලෙන්ජස් බැංගලෝර් කණ්ඩායම Eliminator තරඟයෙන් ඉවතට ඇද දමමින්.
මෙවර තරගාවලියේ මෙම කණ්ඩායම් දෙකම පිතිකරණයේ බලවතුන් වන අතර, අද පැවැත්වෙන අවසන් මහා තරඟය ඉතා තියුණු මුහුණුවරක් ගනු ඇතැයි අපේක්ෂා කෙරෙනවා.
අවසන් මහා තරගයේ දී රාජස්ථාන් පිළ ජෝෂ් බට්ලර් සහ දඟ පන්දු යවන ක්රීඩක යුශ්වේන්ද්ර චාහල් කෙරෙහි වැඩි බලාපොරොත්තුවක් තබාගෙන ඇති අතර ගුජරාට් පිළේ ආරම්භක පිතිකරුවන් වන විර්දිමන් සහා සහ ශුබ්මන් ගිල් මෙන්ම මැදපෙළ පිතිකරු ඩේවිඩ් මිලර් කෙරෙහි වැඩි බලාපොරොත්තුවක් තබාගෙන ඇති බවයි ක්රීඩා විචාරකයින් සඳහන් කළේ.
අද රාත්රියේ ලොව වටා සිටින මිලියන සංඛ්යාත ක්රිකට් ප්රේක්ෂකයින් දෑස් දල්වා බලා සිටින්නේ මෙම අවසන් මහා තරගයේ දී ගුජරාට් කණ්ඩායමේ ප්රධාන පුහුණුකරු ගැරී කර්ස්ටන්ගේ සහ රාජස්ථාන් පිළේ අධ්යක්ෂ කුමාර් සංගක්කාරගේ සහ වේග පන්දු පුහුණුකරු ලසිත් මාලිංගගේ සැලසුම් පිටිය මැද දී කෙසේ ක්රියාත්මක වේවි ද යන්නයි.
