ව්‍යාජ ලෙස සකස් කළ වීසා බලපත්‍රයක් භාවිත කර එක්සත් රාජධානිය වෙත පැන යාමට තැත් කළ ශ්‍රී ලාංකික තරුණයෙකු කටුනායක ගුවන් තොටුපොළ ආගමන විගමන නිලධාරීන් විසින් අත්අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ යාපනය, පේදුරුතුඩුව ප්‍රදේශයේ පදිංචි 23 හැවිරිදි තරුණයෙක්.
මොහු ඊයේ (20) උදෑසන කටාර් ගුවන් සේවයේ කිව්.ආර් – 659 දරණ ගුවන් යානයෙන් දෝහා වෙත ගොස්, එතැන් සිට එක්සත් රාජධානිය වෙත යාමට සූදානමින් කටුනායක ගුවන් තොටුපොළ වෙත පැමිණ තිබුණා.
එහිදී ඔහු සතුව තිබූ වීසා බලපත්‍රය ඇතුළු අනෙකුත් ලියකියවිලි නිශ්කාශන කටයුතු සඳහා ගුවන් තොටුපොළ පිටත්වීමේ පර්යන්තයේ ආගමන විගමන නිලධාරීන් වෙත භාර දී තිබුණා.
එහිදී ඉදිරිපත් කර තිබූ වීසා බලපත්‍රය පිළිබඳව ඇති වූ සැකය මත අනෙකුත් ලියකියවිලි සියල්ල ගුවන් තොටුපොළ දේශසීමා ආවේක්ෂණ ඒකකයේ නිලධාරීන් වෙත යොමුකර තිබෙනවා.
ඒ, අනුව සිදුකළ තාක්ෂණික පරීක්ෂා කිරීම්වල දී මෙම වීසා බලපත්‍රය කූඨ ලෙස සකස් කළ එකක් බවට තහවුරු කර ගැනීමට හැකිව තිබෙනවා.
අනතුරුව තරුණයා අත්අඩංගුවට ගැනීමටයි කටයුතු කර ඇත්තේ.
ආගමන විගමන නිලධාරීන් විසින් මෙලෙස අත්අඩංගුවට ගත් තරුණයා වැඩිදුර විමර්ශන කටයුතු සදහා කටුනායක ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන් වෙත භාර දී තිබෙනවා.
Immigration is not easy now