පයාගල පොලිස් වසමට අයත් මග්ගොන ප්රදේශයේ ක්රියාත්මක ප්රසිද්ධ ළමා නිවාසයක පරිවාස භාරයේ සිටින පිරිමි ළමයින් තිදෙනෙකු ඊයේ (19) එම ළමා නිවාසයෙන් පලාගොස් තිබෙනවා.
එලෙස පලා ගොස් ඇත්තේ වයස අවුරුදු 15,14 යන වයස්වල පසුවූ ළමයින් තිදෙනෙක්.
මෙම ළමයි තිදෙනා ළමා නිවාසයේ සිට කිලෝමීටර් 03ක පමණ දුරක් පයින් ගමන් කරමින් සිටිය දී කපුගොඩ ප්රදේශයේ දී ප්රදේශවාසීන් විසින් දැක ඇති අතර, එහිදී ඇති වූ සැකය මත එම ළමුන් තිදෙනාගෙන තොරතුරු විමසා තිබෙනවා.
එහිදී අනාවරණය වී ඇත්තේ ඔවුන් ළමා නිවාසයෙන් පලා යන බවයි.
ළමා නිවාසයේ දැඩි හිංසනය මත එය ඉවසා දරාගත නොහැකිව ළමා නිවාසයෙන් පලා යෑමට මෙලෙස තීරණය කළ බවයි එම ළමුන් තිදෙනා වැඩිදුරටත් පවසා ඇත්තේ.
අනතුරුව ප්රදේශවාසීන් මෙම ළමයි තිදෙනා පිළිබඳව පයාගල පොලිසියේ ස්ථානාධිපතිතුමා දැනුවත් කිරීමෙන් අනතුරුව පයාගල පොලිසිය විසින් මෙම දරුවන් පොලිස් භාරයට ගෙන තිබෙනවා..
පොලිස් භාරයට ගත් ළමයින් තිදෙනා අද (20) දින කළුතර මහේස්ත්රාත් අධිකරණයට ඉදිරිපත් කිරීමෙන් අනතුරුව සුදුසු ක්රියාමාර්ග ලබාගැනීමට නියමිත බව පොලිසිය සඳහන් කළා.
