කුලී ගමන් යන මුවාවෙන් පැමිණ ත්‍රීවිල් රථ රියදුරුට පිහියෙන් ඇන පින්වත්තේ දී ත්‍රීවිල් රථයක් මංකොල්ල කා තිබෙනවා.
අප ප්‍රාදේශීය වාර්තාකරු පැවසුවේ මෙම සිදුවීම සිදු ව ඇත්තේ වාද්දුව – තල්පිටිය ලෝලුගස්මංකඩ මංසන්ධියේ දී බවයි.
ත්‍රීවිල් කුලියට ගමන්ගන්නා ස්ථානයට පැමිණි පුද්ගලයෙකු ඔහුට පානදුර පින්වත්ත ප්‍රදේශයට කුලී ගමනක් යාමට අවශ්‍ය බව පවසා එම ස්ථානයේ ත්‍රීවිල් රථයක නැග පානදුර පින්වත්ත ප්‍රදේශයට ගමන් කොට ඇති බවයි වාර්තා වන්නේ.
පින්වත්ත ප්‍රදේශයට යන අතරතුර එම ත්‍රීවිල් රථයට තවත් පුද්ගලයින් දෙදෙනෙකු නංවාගෙන ඇති අතර එම තිදෙනා ද කැටුව ත්‍රීවිල් රථය පානදුර -පින්වත්ත දුම්රිය ස්ථානය අසලට ගොස් ත්‍රීවිල් රථ රියදුරාට ත්‍රීවිල් රථයෙන් බැස යන ලෙස ඔවුන් තිදෙනා ප්‍රකාශ කර තිබෙනවා.
ත්‍රීවිල් රථ රියදුරු රථයෙන් බැස යාම ප්‍රතික්ෂේප කළ විට රියදුරුට එම පුද්ගලයින් තිදෙනාගෙන් එක් අයෙකු ඉනෙහි සඟවා තිබූ තියුණු ආයුධයක් ගෙන ඔහුගේ උදරය ප්‍රදේශයට සහ පපු ප්‍රදේශයට ඇන තුවාල සිදු කර ඇති බවයි පැවසෙන්නේ.
එයින් බියට පත්වූ ත්‍රීවිල් රථ රියදුරු ත්‍රීවිල් රථය දමා එම ප්‍රදේශයේ පිහිටි ඔහුගේ ඥාති නිවසකට දිවගොස් තිබෙනවා.
ඒ අතරතුර ත්‍රීවීල් රථයේ පැමිණි පුද්ගලයින් තිදෙනා එම ත්‍රීවිල් රථය මංකොල්ලකා එම ප්‍රදේශයෙන් පලාගොස් ඇති බවයි වාර්තා වන්නේ.
රථ රියදුරු මේ වන විට පානදුර මූලික රෝහලේ ප්‍රතිකාර ලබන අතර මෙසේ රෝහල්ගත කොට ඇත්තේ වයස අවුරුදු 37ක් වන වාද්දුව තල්පිටිය ප්‍රදේශයේ පුද්ගලයෙක්.
මෙම සිද්ධිය සම්බන්ධයෙන් එම ත්‍රීවිල් රථ රියැදුරුගේ දෙමව්පියන් පින්වත්ත පොලිසියට සිදුකළ පැමිණිල්ලක් මත ඉදිරි විමර්ශන කටයුතු ක්‍රියාත්මකයි.
