හක්කපටස් ආහාරයට ගැනීමෙන් මුඛයේ ඇති වූ බරපතළ තුවාල හේතුවෙන් මියගිය වනඅලියකුගේ සිරුරක් ඉපලෝගම – ඉහළකාගම ප්‍රදේශයේ තිබී ගනේවල්පොල වනජීවී කාර්යාලයේ නිලධාරින් සොයාගෙන තිබෙනවා.
අප ප්‍රාදේශීය වාර්තාකරු පැවසුවේ; ගම්වාසීන්ගෙන් ලත් තොරතුරකට අනුව සිදුකළ සෝදිසියක දී එම වන අලියාගේ සිරුර සොයා ගැනුණු බවයි.
මෙලෙස මිය ගොස් ඇත්තේ කලාවැව ජාතික උද්‍යානයේ සැරිසැරූ උස අඩි 07 ක් පමණ වන වනඅලියෙක්.
නාඹර වයසේ පසුවන එම අලියාගේ වයස අවුරුදු 18ක් පමණ වෙතැයි වනජීවී නිලධාරීහු අනුමාන කරනවා.
වනඅලියා මින් දින කිහිපයකට ඉහත දී හක්ක පටස් ආහාරයට ගෙන ඇති බවයි සැක පළ කරන්නේ.
එම හේතුවෙන් අලියාගේ මුඛයට බරපතළ හානි සිදු ව තිබූ අතර; අනුරාධපුර පණ්ඩුලගම වනජීවී පශු වෛද්‍ය ඒකකයේ නිලධාරීන් විසින් ඒ වෙනුවෙන් ප්‍රතිකාර ලබාදීම ද ආරම්භ කෙරුණා.
හක්කපටස් ආහාරයට ගැනීමෙන් බරපතළ තත්ත්වයේ සිටි එම වනඅලියා වනජීවී පශු වෛද්‍ය නිලධාරින්ගෙන් ප්‍රතිකාර ලබමින් සිටින අතරතුර දීයි මෙලෙස මරුමුවට පත්ව ඇත්තේ.
මෙම සත්ත්වයා මියගොස් ඇත්තේ ගම්මානයේ පිහිටි නිවසස් පිටිපසයි.
මියගිය වනඅලියාගේ පශ්චාත් මරණ පරීක්ෂණය අනුරාධපුර පණ්ඩුලගම වනසත්ව සෞඛ්‍ය කළමනාකරණ ඒකකයේ පශු වෛද්‍ය චන්දන ජයසිංහ විසින් අද පස්වරුවේ පවත්වනු ලැබූ අතර එම වනඅලියාගේ මරණය හක්කටපටස් ආහාරයට ගැනීමෙන් මුඛයට ඇති වූ බරපතළ හානිය හේතුවෙන් සිදුවූවක් බවටයි තීරණය කෙරුණේ.
