සෞඛ්‍ය අමාත්‍යංශය මගින් පාලනය වන කිසිදු රෝහලක විදුලිය ඉදිරි මාස දෙකක කාලයක් සඳහා නොකපා සිටීම සඳහා වන සහතිකය විදුලි බල මණ්ඩලය ලබාදුන් බව සෞඛ්‍ය අමාත්‍යංශයේ අතිරේක ලේකම් වෛද්‍ය සමන් රත්නායක මහතා පවසනවා.
සෞඛ්‍ය අමාත්‍යවරයා සහ ලේකම්වරයා විදුලි බල මණ්ඩලයේ සභාපතිවරයා සමඟ ඇති කරගත් එකඟතාවකට අනුව මෙම සහතිකය විදුලි බල මණ්ඩලය මගින් ලබා දුන් බවයි ඔහු සඳහන් කළේ.
අද මහනුවර දී මාධ්‍ය වෙත අදහස් දක්වමින් සෞඛ්‍ය අමාත්‍යංශයේ අතිරේක ලේකම්වරයා මේ බව ප්‍රකාශ කළා.
කොළඹ ජාතික රෝහලේ හිඟ විදුලි බිල්පත ගෙවීම සඳහා භාණ්ඩාගාරයෙන් රුපියල් මිලියන 120ක් ලබා දුන් බව ද ඔහු අනාවරණ කළා.
ආර්ථික අර්බුදයත් සමඟ සෞඛ්‍ය අමාත්‍යංශය යටතේ පාලනය වන රෝහල්වල විදුලි බිල්පත් ගෙවීමේ දී මාස හතරක පහක පමණ හිඟයක් ඇතිව තිබෙන බවත් අදාළ හිඟ මුදල් ඉදිරි මාස දෙක ඇතුළත ගෙවීමට කටයුතු කරන බවට ලබාදුන් පොරොන්දුව මත විදුලි බල මණ්ඩලයේ සභාපතිවරයා රෝහල්වල විදුලිය විසන්ධි නොකිරීම සඳහා වන එකඟතාවට පැමිණි බව අතිරේක ලේකම්වරයා සඳහන් කළා.
එම එකඟතාවට අනුව මාස දෙකක් ඇතුළත හිඟ විදුලි බිල් ගෙවා දමා ඉන් අනතුරුව සෑම මසකම විදුලි බිල නියමාකාරව ගෙවිය යුතු බවත් ඒ සඳහා අවශ්‍ය මුදල් නියමාකාරව ලබාදෙන බවට භාණ්ඩාගාරයෙන් සහතිකයක් ලබා දී තිබෙන බවත් සමන් රත්නායක මහතා ප්‍රකාශ කර තිබෙනවා.
