හදිසි සහන ද්රව්ය සහ සෝදිසි හා ගලවා ගැනීමේ කණ්ඩායමක් රැගත් පාකිස්ථාන ගුවන් හමුදාවට අයත් C-130 ගුවන් යානය ඊයේ (03) පස්වරුවේ මෙරටට ළගා වුණා.
කොළඹ සිටින පාකිස්ථාන මහ කොමසාරිස්වරයා විසින් එම සහනාධාර තොගය ශ්රී ලංකාවට නිල වශයෙන් භාර දෙනු ලැබු අතර නියෝජ්ය අමාත්ය ජනිත රුවන් කොඩිතුවක්කු ඇතුළු පිරිසක් එම අවස්ථාවට එක්ව සිටියා.
දිට්වා සුළි කුණාටුවෙන් පීඩාවට පත් ජනතාවට සහන සැලසීම වෙනුවෙන් පාකිස්ථාන අග්රාමාත්ය ශෙබාස් ශරීෆ්ගේ (Shehbaz Sharif) උපදෙස් මත පාකිස්ථාන හමුදා සෝදිසි හා ගලවා ගැනීමේ ඒකකයේ සාමාජිකයෝ 47 දෙනෙක් සහ අත්යවශ්ය උපකරණ මෙට්රික් ටොන් 6.5ක් මෙරටට එවා තිබෙනවා.
කූඩාරම් , බ්ලැන්කට්, බ්ලැන්කට් ඇතිරිලි, ජීවිතාරක්ෂක ජැකට්, පිම්බෙන බෝට්ටු, ජලය ඉවත් කරන පොම්ප, ලාම්පු, පැදුරු, මදුරු දැල්, ළදරු කිරිපිටි, කෑමට සූදානම් ආහාර සහ අත්යවශ්ය ඖෂධ මෙම සහනාධාර තොගයට ඇතුළත් වනවා.
පාකිස්ථාන නාවික හමුදාවට අයත් නෞකා සහ හෙලිකොප්ටර් යානා දැනටමත් ශ්රී ලංකාවේ සහන මෙහෙයුම්වල නිරතව සිටිනවා.
ජනාධිපති අනුර කුමාර දිසානායක සහ පාකිස්ථාන අග්රාමාත්ය ශෙබාස් ශරීෆ් (Shehbaz Sharif) අතර පැවති සාකච්ඡාවලින් පසුව ශ්රී ලංකාවට ලබා දෙන මානුෂීය සහනාධාර පුළුල් කිරීමට පාකිස්ථානය කටයුතු කර තිබෙනවා.
