සොරකමක් සිදු කිරීම සම්බන්ධයෙන් බාලවයස්කාර ළමුන් දෙදෙනෙක් වාහනයක ලණුවකින් ගැට ගසා මාර්ගයේ ඇදගෙන ගිය සිදුවීමක් විදෙස් මාධ්‍ය වාර්තා කරනවා.
ඉන්දියාවේ ඉන්දෝර්හි චොයිත්‍රම් එළවළු වෙළඳපොලේ මෙම සිදුවීම සිදුව ඇති අතර, මෙම බාල වයස්කරුවන් දෙදෙනා පුද්ගලයෙකුගෙන් ඉන්දීය රුපියල් 10,000ක මුදලක් සහ ජංගම දුරකථනයක් සොරාගෙන පළා යාමටයි උත්සාහ කර ඇත්තේ.
බාල වයස්කරුවන් දෙදෙනා එළවළු ව්‍යාපාරිකයෙකුගෙන් මෙම සොරකම සිදුකර ඇති අතර, මොවුන් දෙදෙනා වයස අවුරුදු 13 සහ 17 යන වයස්වල පසුවන්නන් බවයි වාර්තා වන්නේ.
එළවළු ව්‍යාපාරිකයා සිය ලොරි රථයේ නිදා සිටියදී පිරිමි ළමයින් දෙදෙනා මෙලෙස මුදල් සහ ජංගම දුරකථනය සොරකම් කර ඇති බවයි අනාවරණය වී ඇත්තේ.
සොරකම සිදුකර පළායාමට තැත්කළ මොවුන් දෙදෙනා වෙළඳපොලේ රැඳී සිටි පිරිස විසින් අල්ලාගෙන පහර දී, වාහනයක ගැට ගසා පාරේ ඇදගෙන ගොස් ඇති බවයි එරට පොලිසිය සඳහන් කළේ.
බාල වයස්කරුවන්ට එරෙහි හිංසනයන් සිදුකිරීම සම්බන්ධයෙන් ව්‍යාපාරිකයාට සහ තවත් තිදෙනෙකුට එරෙහිව නීතිමය ක්‍රියාමාර්ග ගැනීමටයි පොලිසිය කටයුතු කර ඇත්තේ.
