එළඹෙන ජනාධිපතිවරණයේ දී තම සහාය සහ පක්ෂයේ සහාය පෙර කියූ පරිදි ම සමගි ජන සන්ධානයේ ජනාධිපති ධුර අපේක්ෂක සජිත් ප්‍රේමදාස හට ලබාදීමේ තීරණය කිසිදු අයුරකින් වෙනස් නොවන බව පාර්ලිමේන්තු මන්ත්‍රී එම්. ඒ සුමන්දිරන් මහතා පවසනවා.
සිය නිල X ගිණුමෙහි සටහනක් තබමින් ඉලංගෙයි තමිල් අරසු කච්චි පක්ෂ නායකවරයා සඳහන් කර සිටින්නේ; පක්ෂයේ තීන්දුව සම්බන්ධයෙන් කිසිදු අස්ථාවරභාවයක් හෝ ව්‍යාකූලත්වයක් ඇති කර නොගන්නා ලෙසයි.
ඉලංගෙයි තමිල් අරසු කච්චි පක්ෂය සිය තීරණය සම්බන්ධයෙන් පළමු වරට දැනුම්දුන්නේ සැප්තැම්බර් මස 01 වැනි දිනයි.
එම තීරණය සමස්ත පක්ෂය විසින් ම ගනු ලැබූවක් බවයි සුමන්තිරන් මහතා පෙන්වාදෙන්නේ.
මේ අතර දෙමළ ජාතිකවාදී ස්ථාවරය අනුව පොදු දෙමළ අපේක්ෂකයා වන පී. අරියනේන්ද්‍රන් මහතා හට සහාය පළ කළ යුතු බව ඉලංගෙයි තමිල් අරසු කච්චිහි පාර්ලිමේන්තු මන්ත්‍රී එස්. ශ්‍රීධරන් කියා සිටියා.
ඒ අනුව තමන් ඉදිරි ජනාධිපතිවරණයේ දී තමන් පොදු අපේක්ෂකයා හට සහාය පළ කරන බවයි ඔහු අවධාරණය කළේ.
මෙම තත්ත්වය මතයි පාර්ලිමේන්තු මන්ත්‍රී සුමන්තිරන් මහතා යළිත් සිය පක්ෂයේ මතය සමාජගත කර ඇත්තේ.
