නිරායුධ සිවිල් වැසියන් අටදෙනෙක් භාරතීපුරම් පොලිස් ස්ථානයට රැගෙන විත් සන්නද්ධ කණ්ඩායමක් විසින් වෙඩිතබා ඝාතනය කළ බව කියන අවස්ථාවේ, එම අපරාධය සිදුවූ ස්ථානයේ සිටි බවට මහාධිකරණය හමුවේ අධිචෝදනා ලබා සිටි පොලිස් නිලධාරීන් පස්දෙනෙකුට බරපතළ වැඩ සහිතව ජීවිතාන්තය දක්වා සිරදඬුවම් නියම කිරීමට උතුරුමැද පළාත් බද මහාධිකරණය ඊයේ (28) නියෝග කළා.
මෙලෙස ජීවිතාන්තය දක්වා සිරදඬුවම් නියම වුණේ භාරතීපුරම් පොලිස් ස්ථානයේ හිටපු ස්ථානාධිපති, උප පොලිස් පරික්ෂකවරයෙක් සහ පොලිස් සැරයන්වරු තිදෙනෙක්ටයි.
මේ අතර තවත් පොලිස් නිලධාරීන් දෙදෙනෙක් අදාළ චෝදනාවෙන් නිදොස් කොට නිදහස් කිරීමට ද විනිසුරුවරයා මෙහිදී නියම කළා.
1998 වසරේ ජනවාරි 31 වන දින හෝ ඊට අසන්න දිනක දී කන්තලේ, භරතීපුරම් ගම්මානයේ පදිංචිව සිටි නිරායුධ දමිළ සිවිල් වැසියන් අට දෙනෙක් භාරතීපුරම් පොලිස් ස්ථානයට රැගෙන විත් සන්නද්ධ කණ්ඩායමක් විසින් වෙඩි තබා ඝාතනය කර ඇති බවයි අනාවරණය වී ඇත්තේ.
අදාළ අපරාධය සිදුවූ ස්ථානයේ දී සිටි බවට පසුව විත්තිකරුවන්ට එරෙහිව ත්රිකුණාමලය මහාධිකරණය හමුවේ නීතිපතිවරයා විසින් අධිචෝදනා ගොනුකර තිබුණා.
හදිසි නියෝග අවස්ථා විධිවිධාන පනතේ 26 (1) වගන්තිය ප්රකාරව මනුෂ්ය ඝාතනයන් සිදු කිරීමේ අදහසින් නීති විරෝධී රැස්වීමක සාමාජිකයන් ලෙස සිටි බවට විත්තිකාර පොලිස් නිලධාරීන්ට එරෙහිව එල්ල වී තිබූ චෝදනාවයි.
